హైదరాబాద్‌‌: తెలంగాణ ఆర్టీసీ ఐకాస, విపక్షాలు ట్యాంక్‌బండ్‌పై సకల జనుల సామూహిక దీక్షకు పిలుపు నిచ్చిన నేపథ్యంలో ఈ కార్యక్రమాన్ని అడ్డుకునేందుకు పోలీసులు పటిష్ఠ చర్యలు చేపడుతున్నారు. ఇప్పటికే  పలువురు నేతలను అరెస్టు చేసిన పోలీసులు తాజాగా.. ఆర్టీసీ ఐకాస కన్వీనర్‌ అశ్వత్థామరెడ్డిని నిర్బంధంలోకి తీసుకున్నారు. హిమయత్‌ నగర్‌లోని లిబర్టీ వద్ద ఆయన్ను అదుపులోకి తీసుకొని స్థానిక పోలీస్‌స్టేషన్‌కు తరలించారు.
బుద్ధభవన్‌ వద్ద ఆర్టీసీ కార్మికుల ఆందోళన
ట్యాంక్ బండ్‌లోని బుద్ధ భవన్ వద్ద ఆర్టీసీ కార్మికులు ఆందోళనకు దిగారు. ఒక్కసారిగా 50 మంది కార్మికులులు ట్యాంక్‌బండ్‌పైకి దూసుకురావడంతో పోలీసులు వారిని అడ్డుకున్నారు. అనంతరం వారిని అరెస్టు చేసి పోలీస్‌స్టేషన్‌కు తరలించారు.