కళ్ల జోడుందా... అయితే ఏంటి?

చాలామంది ఎంత బాగా తయారైనా  కళ్లజోడు తమ లుక్‌ని మార్చేస్తుందని బాధపడుతుంటారు. దానికి ప్రత్యామ్నాయం లెన్స్‌. అలాగని రోజుల తరబడి వాటిని వాడుతుంటే... కళ్లు పొడిబారొచ్చు.  అద్దాలు ఉన్నా...మీరు మెరిసిపోవాలంటే...ఈ మెలకువలు పాటిస్తే సరి.
* వీలైనంతవరకూ జుట్టుని వదిలేసుకునే బదులు... జడ వేసుకోవడమే మేలు. అలాని మరీ బిగుతుగా కాకుండా ఫ్రెంచ్‌ బ్రెయిడ్‌, ఫిష్‌టెయిల్‌ వంటివి ప్రయత్నిస్తే... స్టైలిష్‌ లుక్‌ మీ సొంతం అవుతుంది.
* కళ్లద్దాలు పెట్టుకున్నప్పుడు కనుబొమలను తీర్చిదిద్దుకోవడం తప్పనిసరి. సన్నటి ఫ్రేమ్‌ వాడినప్పుడు కనుబొమల్ని మరీ దట్టంగా దిద్దొద్దు. అదే మందంగా ఉన్నవి వాడేటప్పుడు మాత్రం విల్లు ఆకృతిలో ఐబ్రోపెన్సిల్‌తో దిద్దుకోండి. దీనివల్ల మీ ముఖాకృతి చక్కగా కనిపిస్తుంది.
* కళ్లజోడు పెట్టుకున్నప్పుడు ఐషాడో అంత అందంగా అనిపించదు. కంటికి పెట్టుకునే లైనర్‌ మాత్రం కాస్త మందంగా ఉంటే... అద్దాల్లోంచి కళ్లు విశాలంగా కనిపిస్తాయి. అవుట్‌లైన్‌ కొత్తగా కనిపించేలా చేస్తుంది. నలుపు, బ్రౌన్‌ వంటి రంగులతో పాటు తెలుపు, గోధుమ వర్ణాల్నీ ప్రయత్నించొచ్చు.
* కళ్లు పెద్దగా కనిపించేందుకు మస్కారా అవసరం. మేకప్‌ మరీ అతిగా ఉండకుండా చూసుకోవడం తప్పనిసరి. పెదాలకు కాస్త ముదురు రంగు లిప్‌స్టిక్‌ బాగుంటుంది. చెవులకు స్టడ్స్‌ మాత్రమే కాదు... జుంకాలూ నప్పుతాయి.