ఇంటర్నెట్‌డెస్క్‌: ఆకలితో ఉన్న ఓ వానరం ఓ వ్యక్తి చేతిలో ఉన్న డబ్బు సంచిని తీసుకొని ఉడాయించిన ఘటన ఉత్తర్‌ప్రదేశ్‌లో జరిగింది. ఉత్తర్‌ప్రదేశ్‌లోని బదాయూలో ఓ వ్యక్తి తన దగ్గర ఉన్న రూ.57 వేల నగదును బ్యాంకులో జమ చేయడానికి తీసుకెళుతున్నాడు. మధ్యలో మరో పనిలో  నిమగ్నమైన ఆ సంచిని పక్కన పెట్టాడు. దీనిని గమనించిన ఓ కోతి ఆ సంచిని  తీసుకొని ఉడాయించింది. సమీపంలోని చెట్టు ఎక్కి తాపీగా ఆ సంచిలో తినుబండాల కోసం వెతికింది. ఆశించినవి ఏవీ దానిలో లేకపోవడంతో నోట్లను విసిరేసింది. ఇదంతా చూసి బెంబేలెత్తిన ఆ వ్యక్తి కేకలు వేయడంతో గూమిగూడిన జనం నోట్లను పట్టుకునేందుకు ఎగబడ్డారు. చాలా మంది నోట్లను ఆ వ్యక్తికే తిరిగి అప్పగించారు. కానీ, చివరికి లెక్క చూసుకుంటే మాత్రం కొంత మొత్తం తగ్గింది.