రాబోయేదంతా రోబోల యుగం! ఏ ఉద్యోగం చేయాలన్నా టెక్నాలజీ కావాలి... కొలువులో నెగ్గుకురావాలంటే ఆర్టిఫీషియల్‌ ఇంటెలిజెన్స్‌ తప్పనిసరి మరి! దీన్ని దృష్టిలో పెట్టుకునే పిల్లలను సాంకేతికతలో కొత్త అడుగులు వేయిస్తున్నారీ మహిళలు. విద్యావ్యవస్థలో మార్పులు తీసుకురావాలని కోరేవారొకరైతే... విద్యార్థులకు శిక్షణ ఇచ్చి మెరికల్లా మారుస్తున్నారు మరొకరు. వారే చెన్నైకి చెందిన అదితీ ప్రసాద్‌, వరంగల్‌కు చెందిన బండారు సుకన్య.

ఫ్యాన్‌ ఎలా తిరుగుతుంది... బస్సు, కారు ఇవన్నీ అంత వేగంగా ఎలా వెళ్లగలుగుతున్నాయి...  ఇలా చెప్పుకుంటూ పోతే పిల్లలకు వచ్చే సందేహాలు బోలెడు. పరిశోధనా రంగం అంటే ఆసక్తి ఉన్న పిల్లలకు భవిష్యత్తులో ఇవి ఎంతో అవసరం. వీటిని గుర్తించే అదితీ ప్రసాద్‌ రోబోటిక్స్‌ అనే సంస్థను ప్రారంభించింది.

అదితీ ప్రసాద్‌ స్వస్థలం చెన్నై. ఆమె తల్లిదండ్రులిద్దరూ వ్యాపారవేత్తలే.  వారికి ఎప్పటినుంచో విద్యావ్యవస్థలో మార్పులు తేవాలని ఉండేది. అదితి పుణెలో న్యాయవిద్యలో డిగ్రీ చదివింది. పబ్లిక్‌ పాలసీ అంశంగా సింగపూర్‌లో పీజీ చేసింది. అప్పటి నుంచే దేశంలోని విద్యావ్యవస్థ గురించి ఆలోచించేది. ‘చదివే చదువుకు, చేసే ఉద్యోగానికి చాలా వ్యత్యాసం. కొన్ని సందర్భాల్లో పాఠశాలలో ఒకటి నేర్చుకుంటే, ఉద్యోగాల్లో పూర్తిగా భిన్నంగా చేయాల్సిన పరిస్థితి. ప్రపంచం సాంకేతిక రంగంలో దూసుకుపోతోంది. వాటికి తగ్గట్టు పిల్లలు రాటుదేలాలంటే చిన్నప్పటి నుంచే వారికి నైపుణ్యాలు నేర్పించాలి. అప్పుడే వారికి మంచి భవిష్యత్తు ఉంటుంది. మా చెల్లి బయోటెక్‌ చదివి, న్యూరోసైన్స్‌లో పీహెచ్‌డీ చేసింది. ఇద్దరం కలిసి ఏం చేస్తే విద్యార్థులను మెరుగ్గా తీర్చిదిద్దగలమో ఆలోచించాం. స్టెమ్‌ అంశాల మీద ఎక్కువగా దృష్టి సారించాలని నిర్ణయించుకున్నాం. అలా 2009లో ఏర్పడిందే రోబోటిక్స్‌...’ అని చెబుతుంది అదితి.

ఏం చేస్తారంటే... ఈ సంస్థ విద్యార్థులకు సైన్స్‌, టెక్నాలజీ, ఇంజినీరింగ్‌, గణితం(స్టెమ్‌) అంశాల్లో మెలకువలు నేర్పిస్తుంది. పిల్లలతో ప్రయోగాలూ చేయిస్తుందీ సంస్థ. ఎల్‌కేజీ నుంచి 12వ తరగతి చదివే విద్యార్థుల కోసం భిన్నమైన బోధనా పద్ధతులు అందుబాటులోకి తెచ్చారు. రకరకాల ప్రాజెక్టులిచ్చి వారిలో సృజనాత్మకత పెంపొందించడానికి కృషి చేస్తున్నారు. ‘మేం హార్డ్‌వేర్‌ నుంచి సాఫ్ట్‌వేర్‌ వరకూ మొత్తం 60 రకాల ప్రాజెక్టుల్ని రూపొందించాం. ఇందులో ఎలక్ట్రానిక్స్‌, మెకానిక్స్‌, రోబోటిక్స్‌... ఇలా సాంకేతికతకు సంబంధించిన ఏ అంశాలనైనా బోధిస్తాం. ప్రతి 20 మంది పిల్లలకు ఒక శిక్షకుడిని నియమిస్తాం. ఎలాంటి సందేహాలనైనా తీర్చుకోవచ్చు. ఎలక్ట్రానిక్‌ వస్తువుల పనితీరుపైనా అవగాహన కల్పిస్తాం. చిన్నపిల్లలకు ప్రాథమిక అంశాలు నేర్పిస్తాం. వయసు పెరిగే కొద్దీ శిక్షణలో స్థాయి పెరుగుతుంది. ప్రయోగాత్మకంగా తెలుసుకుంటున్నారు కాబట్టి ఇవి వారిలో జిజ్ఞాస, సమస్యలకు పరిష్కారాలు కనుగొనేతత్వాన్ని పెంచుతాయి. సాధించగలమన్న ఆత్మవిశ్వాసం వస్తుంది. సాఫ్ట్‌వేర్‌, హార్డ్‌వేర్‌ మనుషుల జీవితాలతో ఎలా అనుసంధానమయ్యాయో వారికి సులువుగా అర్థమవుతుంది. భవిష్యత్తులో వారు నాణ్యమైన పరిశోధనలు చేయడానికి ఇవి ఉపయోగపడతాయి. మేం విద్యార్థులకు సెలవులు, వేసవిలో శిక్షణ ఇవ్వడానికి ప్రాధాన్యం ఇస్తాం. పాఠశాలలు మమ్మల్ని సంప్రదిస్తే అక్కడికే వెళ్లి విద్యార్థులకు తర్ఫీదునిస్తామ’ని అంటుందామె.

ఇండియన్‌ గాళ్స్‌ కోడ్‌తో... ఈ సంస్థ నిర్వహించే కార్యక్రమాలకు అమ్మాయిల హాజరీ తక్కువగా ఉండేది. దానికి కారణాలు ఆరాదీస్తే... అమ్మాయిలు వీటిని నేర్చుకుని ఏం చేస్తారులే అనే భావన తల్లిదండ్రుల్లో ఉండేది. అప్పుడే విద్యార్థినుల కోసం ప్రత్యేకంగా ఓ కార్యక్రమం చేపట్టాలనుకుంది. 2015లో ఇండియన్‌ గాళ్స్‌ కోడ్‌ ప్రారంభించింది. ఇది గ్రామీణప్రాంతాలు, నిరుపేద విద్యార్థినుల కోసం ఉచితంగా చేపట్టిన కార్యక్రమం. దీన్ని తమిళనాడు తిరుచ్చిలోని అన్నై ఆశ్రమంలో మొదలుపెట్టారు. అక్కడుండే వారంతా నిరుపేద కుటుంబాలకు చెందినవారే. కొందరి తల్లిదండ్రులు జైలులో ఉంటారు. ఇక్కడ ఏటా పాతికమంది బాలికలకు శిక్షణ ఇస్తోందీ సంస్థ. ‘దేశంలోని ఇతర గ్రామీణ ప్రాంతాల్లోనూ శిక్షణ ఇస్తున్నాం. ఇవి వారికి సైన్స్‌పై ఆసక్తిని పెంచుతాయ’ని చెబుతోంది అదితి.

ఇబ్బందులు మామూలే... ‘చాలా మందికి రోబోటిక్స్‌ మీద అవగాహన ఉండదు.  ఇప్పుడిప్పుడే తల్లిదండ్రులు ఒప్పుకొంటున్నారని అంటుందామె. 2017లో జరిగిన యునెస్కో పాలసీ ఫోరంలో పాల్గొంది అదితి. సింగపూర్‌ ప్రభుత్వం 15 మంది యువ సొసైటల్‌ లీడర్స్‌లో ఒకరిగా ఆమెను ఎంపికచేసి గౌరవించింది.

రోబోటిక్స్‌పై ఆసక్తితో విద్యార్థులకు శిక్షణ ఇస్తోంది వరంగల్‌కు చెందిన బండారు సుకన్య. ఈమె ఆధ్వర్యంలో సాంకేతికతకు పదును పెట్టుకున్న పిల్లలు... జాతీయ స్థాయి వేదికలపై ప్రతిభ చూపిస్తున్నారు.

నేను 2002లో బీఈ ఎలక్ట్రానిక్స్‌ పూర్తి చేశా. పెళ్లి తరువాత అబుదాబీలో కొన్నాళ్లున్నాం. మా వారు సుమంత్‌కుమార్‌ అక్కడ ఒక ఎంఎన్‌సీలో  చేసేవారు. కొన్ని రోజుల తరువాత మా అత్తమామలకోసం వరంగల్‌ వచ్చేశాం. మా వారు కిట్స్ కళాశాలలో ఫ్యాకల్టీగా చేరారు. నాకు ఇంటి దగ్గర ఖాళీగా ఉండడం ఇష్టం లేక రోబోటిక్స్‌లో ఆసక్తి చూపించే వారికి శిక్షణ ఇవ్వాలని నిర్ణయించుకున్నా. అలా రెండేళ్ల క్రితం 14 మంది పిల్లలతో ‘క్రియేటివ్‌ రోబోటిక్స్‌’ పేరుతో సంస్థను ప్రారంభించా. ఓ గదిని అద్దెకు తీసుకుని దాన్నే ప్రయోగశాలగా మలిచా. ఇప్పటివరకూ 80 మంది నాదగ్గర శిక్షణ పూర్తి చేసుకున్నారు. మరో 40 మందికి బుల్లి రోబోలను తయారుచేసే పాఠాలు చెబుతున్నా.

విద్యార్థి దశలోనే బీజం పడాలి... రోబోటిక్స్‌ పరిజ్ఞానంపై పిల్లలకు ఆసక్తి పెంచడానికి మా కోర్సును ఏడు అంచెలుగా చేసి పాఠాలు చెబుతున్నా. అన్ని దశలు పూర్తిచేస్తే... హ్యుమనాయిడ్‌ రోబోను తయారుచేసే నైపుణ్యం సాధించేలా కోర్సు ఉంటుంది. సామాజిక సమస్యలకు పరిష్కారం చూపే రోబోల నమూనాలు విద్యార్థులే సొంతంగా రూపొందిస్తారు. ప్రతి శని, ఆదివారాల్లో తరగతులు ఉంటాయి. వేసవిలోనూ ప్రత్యేక శిక్షణా శిబిరం ఏర్పాటుచేస్తున్నా. కొందరు ప్రభుత్వ పాఠశాలల విద్యార్థులకు ఉచితంగా శిక్షణ ఇస్తున్నా. తరగతులు ఉండేది కాసేపే అయినా... గంటలతరబడి ప్రయోగాలు చేస్తూ నైపుణ్యాలను పెంచుకుంటారు మా పిల్లలు.

ప్రతిభ చూపించారు... అంధులకు దారి చూపించే ‘స్మార్ట్‌ హ్యాండ్‌ ఫర్‌ బ్లైండ్‌’ రోబో, భూమిలో తేమ శాతాన్ని బట్టి నీరు వృథా కాకుండా సరఫరా చేసే పరిజ్ఞానాన్ని మా విద్యార్థులు అభివృద్ధి చేశారు. ఈ రెండు ఆవిష్కరణలు బెంగళూరులో జాతీయ స్థాయిలో జరిగే ‘ఇన్‌సెఫ్‌’ రోబోటిక్స్‌ పోటీలకు ఎంపికయ్యాయి. గతవారం వరంగల్‌ ఎన్‌ఐటీ టెక్నోజియాన్‌ వేడుకల్లోనూ వీటిని ప్రదర్శించాం. గతేడాది ఎస్‌.ఆర్‌.ఇంజినీరింగ్‌ కళాశాలలో జరిగిన ఎస్‌ఆర్‌ఐఎక్స్‌ మేక్‌ అండ్‌ మార్కెట్లో ముగ్గురు విద్యార్థులు కలిసి రూపొందించిన ‘స్మార్ట్‌ డస్ట్‌బిన్‌’ ఆవిష్కరణకు బహుమతి వచ్చింది. స్వచ్ఛభారత్‌కు స్మార్ట్‌ టెక్నాలజీని జోడించి దీన్ని రూపొందించారు. ఫుట్బాల్‌ ఆడే బాహుబలి రోబో గురించి ప్రత్యేకంగా చెప్పుకోవాలి. ఇంజినీరింగ్‌ విద్యార్థులతో పోటీపడుతూ మా విద్యార్థులు అనేక పరికరాలు చేస్తున్నారు. విద్యార్థులకు రోబోటిక్స్‌పై అవగాహన కల్పించాలనే ఉద్దేశంతో ఖాళీ సమయాల్లో సెమినార్లకు హాజరై ఉపన్యాసాలు ఇస్తున్నా. శిక్షణతో వచ్చిన డబ్బులో కొంత మొత్తంతో ప్రభుత్వ పాఠశాలల్లోని విద్యార్థులకు పుస్తకాలు, పెన్నులు పంచుతున్నాం. నాకున్న అర్హతలతో ఇంతకు మించిన ఆదాయం, హోదా ఉండే ఉద్యోగ అవకాశాలు వచ్చాయి. ఉద్యోగంలో దొరకని సంతృప్తి పిల్లలకు పాఠాలు చెప్పడంలో లభించింది. వీలైనంతమందిని ఈ రంగంలో ఉన్నత స్థాయికి తీసుకెళ్లడమే నా లక్ష్యం.