దిల్లీ: పశ్చిమ బెంగాల్‌కు చెందిన ఇద్దరు కేంద్రమంత్రుల ప్రమాణ స్వీకార సమయంలో లోక్‌సభలో ‘జై శ్రీరాం’ నినాదాలు హోరెత్తాయి. వారిద్దరినీ పేరు పెట్టి ఆహ్వానిస్తున్న సమయంలో తోటి భాజపా ఎంపీలు నినాదాలు చేశారు. పరోక్షంగా మమత బెనర్జి లక్ష్యంగా ఈ నినాదాలు చేయడం గమనార్హం.

పశ్చిమ బెంగాల్‌లో ‘జై శ్రీరాం’ నినాదాలు చేసిన వారిపై మమత బెనర్జి విరుచుకుపడుతున్న సంగతి తెలిసిందే. మమత వెళుతుండగా ‘జై శ్రీరాం’ అని నినదించిన ఏడుగురిని పోలీసులు అదుపులోకి తీసుకున్నారు. దీనిపై అటు మమతకు, భాజపా నేతల మధ్య మాటలయుద్ధం కూడా నెలకొంది. ఈ నేపథ్యంలో ఆ రాష్ట్రానికి చెందిన భాజపా సభ్యులు బాబుల్‌ సుప్రియో, దేవిశ్రీ చౌదరి ఎంపీలుగా ప్రమాణ స్వీకారానికి ఆహ్వానించే సమయంలో తోటి సభ్యులు ‘జై శ్రీరాం’ నినాదాలు చేశారు. ఇటీవల జరిగిన ఎన్నికల్లో ఆ రాష్ట్రంలో మొత్తం 42 సీట్లను గాను 18 సీట్లను భాజపా గెలుచుకున్న సంగతి తెలిసిందే.