విశాఖ: రాష్ట్రంలో ఇసుక కొరతపై జనసేన అధినేత పవన్ కల్యాణ్‌ నిర్వహించ తలపెట్టిన లాంగ్‌మార్చ్‌కు తెలుగుదేశం పార్టీ మద్దతు తెలిపింది. ఆదివారం విశాఖ ర్యాలీలో ఆ పార్టీ నేతలు అచ్చెన్నాయుడు, అయ్యన్నపాత్రుడు, గంటా శ్రీనివాసరావు పాల్గొననున్నారు. ఈ మేరకు లాంగ్‌మార్చ్‌లో పాల్గొనాలని ఉత్తరాంధ్రకు చెందిన ముగ్గురు మాజీ మంత్రులకు ఆ పార్టీ అధిష్ఠానం ఆదేశాలిచ్చింది.

మరోవైపు లాంగ్‌మార్చ్‌కు సంఘీభావం తెలియజేసిన వామపక్ష పార్టీలు ప్రత్యక్షంగా పాల్గొనబోమని ఓ ప్రకటనలో పేర్కొన్నాయి. ఇసుక సమస్యపై నిర్వహిస్తున్న నిరసన కార్యక్రమానికి సీపీఐ, సీపీఎంను ఆహ్వానించినందుకు ఆయా పార్టీల రాష్ట్ర కార్యదర్శులు కె.రామకృష్ణు, మధు ధన్యవాదాలు తెలియజేస్తూ పవన్‌కల్యాణ్‌కు లేఖ రాశారు. ఈ సమస్యపై తాము సంఘీభావం ప్రకటిస్తున్నట్లు తెలిపారు. ఈ నిరసన కార్యక్రమానికి భాజపా సహకారం తీసుకోవడానికి జనసేన పార్టీకి అభ్యంతరం లేదనే విషయాన్ని తాము అర్థం చేసుకున్నామని, ఈ వైఖరి తమకు ఆమోదయోగ్యం కాదని ఒక ప్రకటనలో ఇరు వామపక్ష పార్టీల నేతలు పేర్కొన్నారు. అందువల్ల తమ రెండు పార్టీల తరఫున నిరసన కార్యక్రమానికి హాజరుకాలేకపోతున్నామని తెలిపారు.