హైదరాబాద్‌: తాను కూడా పీసీసీ రేస్‌లో ఉన్నానంటూ కాంగ్రెస్ నేత, సంగారెడ్డి ఎమ్మెల్యే తూర్పు జయప్రకాష్‌రెడ్డి (జగ్గారెడ్డి) ఆసక్తికర వ్యాఖ్యలు చేశారు. తనకు పీసీసీ అధ్యక్షుడిగా ఒక అవకాశం ఇస్తే కాంగ్రెస్ పార్టీ బలోపేతం సహా అన్ని వర్గాల ప్రజల సమస్యలపై పోరాటం చేస్తానని ప్రకటించారు. సీఎల్పీలో ఆయన మీడియాతో చిట్‌చాట్ చేశారు. కాంగ్రెస్ పార్టీని అధికారంలోకి తీసుకురావడానికి కృషి చేస్తానని ప్రకటించారు. ఇప్పుడు కేసీఆర్ ఇచ్చే పథకాలకంటే.. తన దగ్గర చాలా మంచి వినూత్న పథకాలు ఉన్నాయని తెలిపారు. సీఎం పదవి ఆశించకుండా పని చేస్తానని వెల్లడించారు. ఈ నెల 17న దిల్లీ వెళ్లి సోనియా, రాహుల్, అహ్మద్ పటేల్, కేసీ వేణుగోపాల్, కుంతియాని కలుస్తాని అన్నారు. పీసీసీ మార్పు జరుగుతుందనే వార్తలు వినిపిస్తున్నాయని, అదే నిజమైతే పురపాలక ఎన్నికల ఎన్నికల తర్వాత ఆ ప్రక్రియ పూర్తి చేయాలని అధిష్ఠానాన్ని కోరతానని చెప్పారు. ఇప్పుడు పీసీసీ ఆశిస్తున్నా నేతలంతా ఆ పదవికి అర్హులేనని అన్నారు. అధిష్ఠానం ఎవరిని నియమించినా అందరం కలిసి పని చేయాల్సిందేనని ఆయన తేల్చిచెప్పారు.