కోల్‌కతా: ఐఐటీల్లో ప్రవేశాల కోసం నిర్వహించే జేఈఈ పరీక్షలో ప్రాంతీయ భాషలపై కేంద్రం అవలంబిస్తున్న విధానాన్ని పశ్చిమబెంగాల్‌ ముఖ్యమంత్రి తప్పుబట్టారు. దీన్ని వ్యతిరేకిస్తూ నవంబర్‌ 11న రాష్ట్ర వ్యాప్త నిరసనలు చేపట్టనున్నట్లు చెప్పారు. ఇతర రాష్ట్రాల్లో కూడా పార్టీలు ఇదే తరహా నిరసనలు చేపట్టాలని ఆమె కోరారు. పరీక్షలో కేవలం గుజరాతీ భాషను మాత్రమే అనుమతించడంపై ఆమె అభ్యంతరం వ్యక్తం చేశారు. బెంగాలీతో పాటు ఇతర ప్రాంతీయ భాషలపై వివక్ష చూపడం తగదన్నారు. దేశంలో విభిన్న భాషలు, సంస్కృతులు ఉన్నాయని, వాటినీ గౌరవించాలని డిమాండ్‌ చేశారు. తమ రాష్ట్ర విద్యాశాఖ మంత్రి జేఈఈ మెయిన్స్‌ పరీక్షలో బెంగాలీని అనుమతించేందుకు గతంలో లేఖ రాస్తే జాతీయ పరీక్ష సంస్థ(ఎన్‌టీఏ) దాన్ని పట్టించుకోలేదని మండిపడ్డారు.