రాహుల్లాసం

పాతబస్తీలో పుట్టిపెరిగిన పక్కా హైదరాబాదీ రాహుల్‌ సిప్లిగంజ్‌!

ఏడో తరగతి ఫెయిలయ్యాడు. ఇంటర్‌ పూర్తి చేయడానికి నాలుగేళ్లు పట్టింది. జీవితంలో ఎన్నో ఓటములు, ఇబ్బందులొచ్చినా వెనకడుగు వేయలేదు. సంగీతం నేర్చుకున్నాడు. గాయకుడిగా దమ్మేంటో చూపాడు. సొంతంగా వీడియోలు చేశాడు. ఓల్డ్‌సిటీ యాసతో, అద్భుతమైన గాత్రంతో.. బిగ్‌బాస్‌ దాకా ప్రయాణం చేశాడు. విన్నర్‌గా నిలిచాడు. రాహుల్‌కి ఈ విజయం ఊరికే రాలేదు. రాత్రికి రాత్రే విజేత కాలేదు. బిగ్‌బాస్‌ షోలో కనిపించిన రాహుల్‌ బాల్యం ఎలా గడిచింది? ఈ విజయం వెనుక ఎవరెవరున్నారు? తను ఈ స్థాయికి రావడానికి అమ్మానాన్నలు అందించిన ప్రోత్సాహం ఎంత?... లాంటి విషయాల్ని అతనే ‘హాయ్‌’తో పంచుకున్నాడు.

బిగ్‌బాస్‌ షోతో ఎన్నో కుటుంబాలకు దగ్గరయ్యాను. మూడునెలలకు పైగా ప్రపంచంతో సంబంధం లేకుండా.. నాలుగు గోడల మధ్య పదిహేను మంది వ్యక్తులతో ఉండటం కష్టం. సహనం అంటే ఏంటో ఈ షో ద్వారా నేర్చుకున్నా. ఒకప్పుడు ఎవడిపైనన్న జోక్‌ వేస్తే పక్కటోళ్లు నవ్వితే జోక్‌ అనుకునేవాణ్ని. బిగ్‌ బాస్‌కి వచ్చాక జోక్‌ ఎవరిపైన వేస్తే వాళ్లూ నవ్వాలి.. అదే మంచి జోక్‌ అని తెలుసుకున్నా. బిగ్‌బాస్‌ హౌస్‌లో పునర్నవి, వరుణ్‌ సందేశ్‌ నాకు ఎంతో సహకరించారు. నోయల్‌ ఆదరణ మరిచిపోలేనిది.