భామిని: శ్రీకాకుళం జిల్లా భామిని మండలం దిమ్మిడిజోల వద్ద జరిగిన రోడ్డు ప్రమాదంలో ఇద్దరు మృతి చెందారు. ద్విచక్ర వాహనాన్ని లారీ ఢీ కొనడంతో ఇద్దరు అక్కడికక్కడే ప్రాణాలు కోల్పోయారు. కొత్తూరు చెందిన యోగేశ్వరరావు(50), జోగేశ్వర్‌ పట్నాయక్(30) అనే ఇద్దరు వ్యక్తులు ఓ శుభకార్యానికి వంటకోసం వెళ్లి తిరిగి వస్తుండగా ఈ ప్రమాదం జరిగింది. ఘటన జరిగిన సమయంలో ఎవరూ లేకపోవడం గమనించిన లారీ డ్రైవర్‌ ప్రమాద స్థలం నుంచి లారీని తీసుకొని వెళ్లిపోయాడు. కానీ, అర కిలోమీటరు దూరంలో వంశధార వంతెన వద్ద లారీ బురదలో చిక్కుకుపోయింది. దీంతో చేసేదిలేక డ్రైవర్‌ అక్కడే ఉండిపోయాడు. సమాచారం అందుకున్న పోలీసులు డ్రైవర్‌ను అదుపులోకి తీసుకొని విచారిస్తున్నారు.