15 రోజుల్లో పోలీస్‌ శిక్షణ

రాంనగర్‌, న్యూస్‌టుడే: పోలీసు ఉద్యోగం కోసం మూడు సార్లు పోటీ పడిన ఆ యువకుడు ఆఖరికి విజయం సాధించాడు.. ఉద్యోగం రావడంతో తల్లిదండ్రులు వివాహం చేయాలని  నిర్ణయించుకున్నారు. రెండు రోజుల్లో నిశ్చితార్థం జరగాల్సి ఉంది. ఈ క్రమంలో రైలు మృత్యురూపంలో వచ్చి అతన్ని అనంతలోకానికి తీసుకెళ్లింది. వివరాల్లోకి వెళ్తే... రాంనగర్‌ డివిజన్‌ అంబేడ్కర్‌ నగర్‌కు చెందిన విజయ్‌కుమార్‌, విజయలక్ష్మి దంపతులకు ముగ్గురు కొడుకులు, ఒక కూతురు. విజయ్‌కుమార్‌ సిగరెట్‌ ఫ్యాక్టరీలో పనిచేస్తున్నాడు. చిన్న కుమారుడు కల్యాణ్‌(27)కు ఈ నెల 14న వివాహ నిశ్చితార్థం జరగాల్సి ఉంది. 28వ తేదీన పోలీస్‌ కానిస్టేబుల్‌గా ట్రైనింగ్‌కు వెళ్లాల్సి ఉంది. సోమవారం ఉదయం 3గంటల సమయంలో విద్యానగర్‌ ప్లాట్‌ఫారం నంబర్‌-2 పట్టాల మధ్య రైలు ఢీకొనడంతో అక్కడికక్కడే మృతి చెందాడు. మొదట గుర్తు తెలియని వ్యక్తిగా భావించారు. మంగళవారం కల్యాణ్‌గా గుర్తించడంతో కుటుంబసభ్యుల రోదనలు మిన్నంటాయి. రాంనగర్‌ కార్పొరేటర్‌ వి.శ్రీనివాస్‌రెడ్డి బాధిత కుటుంబసభ్యులను పరామర్శించారు.