గుంటూరు: రాష్ట్ర ముఖ్యమంత్రి జగన్ ‌మోహన్‌రెడ్డిని విమర్శించినందుకు జనసేన అధినేత పవన్ కల్యాణ్‌కు ప్యాకేజీలు వస్తున్నాయని వైకాపా ఎమ్మెల్యే అంబటి రాంబాబు ఆరోపించారు. గుంటూరు జిల్లా తాడేపల్లిలోని వైకాపా కార్యాలయంలో జరిగిన విలేకరుల సమావేశంలో ఆయన మాట్లాడారు. ఎవరి మత విశ్వాసాలు వారికి ఉంటాయని, దాన్ని అంతా గౌరవించాల్సిందేనన్నారు. జగన్, ఆయన తండ్రి వైఎస్ రాజశేఖర్‌ రెడ్డి చాలా సార్లు తిరుమలకు వెళ్లారని అంబటి గుర్తు చేశారు. మాజీ ముఖ్యమంత్రి చంద్రబాబు, జనసేన అధినేత పవన్ కల్యాణ్ ఇసుక, ఆంగ్ల మాధ్యమంపై అనవసరంగా విమర్శలు చేస్తున్నారని మండిపడ్డారు. చంద్రబాబు తన దూతగా పవన్ కల్యాణ్‌ను దిల్లీకి పంపారని అంబటి ఎద్దేవా చేశారు.