హైదరాబాద్‌: విభిన్నమైన కథలను ఎంచుకుంటూ తనకంటూ గుర్తింపు తెచ్చుకుంటున్నారు కథానాయకుడు శ్రీవిష్ణు. ‘వీర భోగ వసంత రాయలు’ చిత్రం తర్వాత ఆయన ప్రధాన పాత్రలో నటిస్తున్న చిత్రం ‘బ్రోచేవారెవరురా’. వివేక్‌ ఆత్రేయ దర్శకుడు. ఈ చిత్ర ఫస్ట్‌లుక్‌ను ఈరోజు విడుదల చేశారు. లుక్‌లో నీలం రంగులో ఉన్న దిష్టిబొమ్మను చూపిస్తూ.. దాని కింద ‘ఇరుగు దిష్టి.. పొరుగు దిష్టి..ఊళ్లోవాళ్లందరి దిష్టి ఈ 2019లో మీకెవ్వరికీ తగలకూడదని ఆశిస్తూ శుభంభూయాత్’ అని రాశారు. విభిన్నమైన కథాంశంతో ఈ సినిమా ఉండబోతోందని ఫస్ట్‌లుక్‌ను బట్టి అర్థం అవుతోంది. నివేదా థామస్‌, నివేదా పేతురాజ్‌ కథానాయికలు. విజయ్‌ కుమార్‌ మన్యం నిర్మాత. సత్యదేవ్‌, ప్రియదర్శి, రాహుల్‌ రామకృష్ణ కీలక పాత్రలు పోషిస్తున్నారు. వివేక్‌ సాగర్‌ సంగీతం అందిస్తున్నారు.