హైదరాబాద్‌: అక్కినేని నాగచైతన్య కథానాయకుడిగా ప్రముఖ నిర్మాత అల్లు అరవింద్ ఓ సినిమాను నిర్మించనున్నారట. వీరిద్దరి కాంబినేషన్‌లో ఇప్పటికే ‘100% లవ్‌’ సినిమా వచ్చిన సంగతి తెలిసిందే. సుకుమార్‌ దర్శకత్వం వహించిన ఈ సినిమా మంచి విజయం అందుకుంది. కాగా మరోసారి చైతన్య గీతా ఆర్ట్స్‌ పతాకంలో నటించే అవకాశాలు ఉన్నాయని సమాచారం. ఈ సినిమాకు ‘గీత గోవిందం’ దర్శకుడు పరుశురాం దర్శకత్వం వహించనున్నారట.

‘నాగచైతన్య గత కొన్ని రోజులుగా పలుమార్లు గీతా ఆర్ట్స్‌ కార్యాలయానికి వచ్చారు. కథ గురించి అల్లు అరవింద్‌తో చర్చించడానికి ఆయన వచ్చారు. రొమాంటిక్‌ ఎంటర్‌టైనర్‌గా ఈ సినిమాను తీయబోతున్నారు. ఇంకా చర్చల దశలోనే ఉంది. త్వరలోనే అధికారిక ప్రకటన రానుంది’ అని చెబుతున్నారు.

నాగచైతన్య ప్రస్తుతం ‘మజిలీ’ సినిమాలో నటిస్తున్నారు. ఇందులో ఆయన భార్యగా సమంత నటిస్తున్నారు. దివ్యాంశ కౌశిక్‌ ఆయన ప్రేయసి పాత్రను పోషిస్తున్నారు. శివ నిర్వాణ దర్శకుడు. ఇటీవల విడుదలైన ఈ సినిమా టీజర్‌కు మంచి స్పందన లభించింది. మరోపక్క చైతన్య హీరోగా ‘వెంకీ మామ’ సినిమా తెరకెక్కుతోంది. ఇందులో వెంకటేశ్‌ మరో కథానాయకుడి పాత్ర పోషిస్తున్నారు. కేఎస్‌ రవీంద్ర దర్శకత్వం వహిస్తున్నారు.