హైదరాబాద్‌: మెగాస్టార్‌ చిరంజీవి కథానాయకుడిగా సురేందర్‌ రెడ్డి దర్శకత్వం వహించిన ‘సైరా నరసింహారెడ్డి’ చిత్ర ట్రైలర్ బుధవారం విడుదల కాగా అభిమానులు, సినీ ప్రముఖుల నుంచి విశేష స్పందన లభిస్తోంది. అన్ని భాషల్లో కలిపి 24 గంటల్లో 34 మిలియన్‌ వ్యూస్‌ వచ్చినట్లు చిత్ర బృందం ప్రకటించింది. ఈ నేపథ్యంలో అగ్ర కథానాయకుడు మహేశ్ బాబు సైరా ట్రైలర్‌ను చూశారు. ట్రైలర్‌పై తన స్పందనను ట్విటర్‌లో పంచుకుంటూ విజువల్స్‌ అద్భుతంగా ఉన్నాయని కొనియాడారు. ట్రైలర్‌లోని ప్రతి ఫ్రేమ్‌ గ్రాండ్‌గా ఉందని.. చిరంజీవి, అమితాబ్‌ బచ్చన్‌, రాం చరణ్‌, దర్శకుడు సురేందర్‌ రెడ్డి, కెమెరామెన్‌ రత్నవేలులు అద్భుతంగా పనిచేశారని మెచ్చుకున్నారు. ‘సైరా’ ఎప్పుడెప్పుడు చూస్తానా అని ఆసక్తిగా ఎదురు చూస్తున్నానని పేర్కొన్నారు.