ఇంటర్నెట్‌డెస్క్‌: భాషతో సంబంధం లేకుండా జేమ్స్‌ బాండ్‌ చిత్రాలకు ఉండే క్రేజ్‌ అంతా.. ఇంతా కాదు..! హాలీవుడ్‌ నుంచి ఆ సినిమా వస్తుందంటే ప్రతి సినీ ప్రేక్షకుడు ఆసక్తిగా ఎదురు చూస్తాడు. ఈ సిరీస్‌లో ఇప్పటికే ఎన్నో చిత్రాలు ప్రేక్షకులను అలరించాయి. ఇప్పుడు ‘బాండ్‌25’గా రాబోతున్న చిత్రం ‘నో టైమ్‌ టు డై’. డేనియల్‌ క్రెగ్‌ కథానాయకుడు. క్యారీ జోజి ఫుకునగ దర్శకుడు. తాజాగా ఈ చిత్రానికి సంబంధించి అధికారిక పోస్టర్‌ను చిత్ర బృందం అభిమానులతో పంచుకుంది.

వచ్చే ఏడాది ఏప్రిల్‌ 8న అమెరికాలో విడుదలవుతున్న ఈ చిత్రం దానికి ఐదు రోజులు ముందుగానే ఏప్రిల్‌ 3న భారత్‌లో ప్రదర్శితం కానుంది. ఎంఐ6 ఏజెంట్గా బాధ్యతల నుంచి తప్పుకొని జమైకాలో విశ్రాంతి తీసుకుంటున్న బాండ్‌ దగ్గరికి అతని మాజీ సహచరుడు వస్తాడు. ఓ శాస్త్రవేత్తను అపహరించిన వాడిని పట్టుకునే విషయంలో సాయం చేయమని కోరతాడు. దీంతో వేట మొదలుపెట్టిన బాండ్‌కు ఎలాంటి క్లిష్ట పరిస్థితులెదురయ్యాయి? అత్యాధునిక సాంకేతిక పరిజ్ఞానం సాయంతో అరాచకాలకు తెగబడే విలన్‌ను ఎలా పట్టుకున్నాడన్న కథతో ఈ చిత్రం తెరకెక్కుతోంది.