బాక్సింగ్‌ ట్రైనింగ్‌లో వరుణ్‌ తేజ్‌

హైదరాబాద్‌: ఇటీవల విడుదలైన ‘గద్దలకొండ గణేష్‌’ చిత్రంతో మంచి విజయాన్ని అందుకున్నారు టాలీవుడ్‌ యువ నటుడు వరుణ్‌ తేజ్‌. ప్రస్తుతం ఆయన కిరణ్‌ కొర్రపాటి దర్శకత్వంలో సినిమా చేయనున్నారు. స్పోర్ట్స్‌ డ్రామాగా తెరకెక్కుతున్న ఈ చిత్రంలో వరుణ్‌ బాక్సర్‌ పాత్రలో కనిపించనున్నారు. ఇందుకోసం ఆయన కఠోర సాధన చేస్తున్నారు. విదేశాలకు చెందిన బాక్సర్‌ ట్రైనర్‌ నుంచి బాక్సింగ్‌లో ట్రైనింగ్‌ తీసుకుంటున్నారు. ఈ నేపథ్యంలో ఆయన తాజాగా ఓ ఆంగ్ల పత్రికతో ముచ్చటించారు. ‘కిరణ్‌ కొర్రపాటి చిత్రంలో నటించడానికి ఎంతో ఆసక్తిగా ఎదురుచూస్తున్నాను. ముంబయికి చెందిన ట్రైనర్‌ సారథ్యంలో బరువు తగ్గడానికి సాధన చేస్తున్నాను. బాక్సింగ్‌ ట్రైనింగ్‌ కోసం లాస్‌ ఏంజెల్స్‌కు చెందిన ఓ ట్రైనర్‌తో కలిసి పనిచేస్తున్నాను. ఇప్పటివరకూ విభిన్న పాత్రల్లో నటించాను. కానీ మొదటిసారి ఇప్పుడు చేయబోయే పాత్ర కోసం నేను ఫిజికల్‌గా మారుతున్నాను.’ అని వరుణ్‌ తెలిపారు.

ఈ చిత్రంలో వరుణ్‌ తేజ్‌ సరసన కియారా అడ్వాణీ నటించనున్నట్లు సమాచారం. ఇప్పటికే చిత్రబృందం ఆమెను కలసినట్లు తెలుస్తోంది. అంతేకాకుండా ఆమె కూడా ఈ చిత్రంలో నటించేందుకు ఆసక్తిగా ఉన్నట్లు తెలుస్తోంది. దీనికి సంబంధించి ఎటువంటి అధికారిక ప్రకటన వెలువడలేదు. తెలుగులో విడులైన ‘భరత్‌ అనే నేను’, ‘వినయ విధేయ రామా’ చిత్రాల్లో కియారా నటించి తెలుగు ప్రేక్షకులను అలరించారు.