ఇంటర్నెట్‌ డెస్క్‌: వైద్య వృత్తంటేనే తీవ్రతతో కూడుకుంది. చికిత్స చేసేటప్పుడు ఎంతో ఏకాగ్రత, అప్రమత్తత అవసరం. చిన్న పిల్లల విషయంలో అయితే మరీనూ. చిన్నారులతో మమేకం అయితే తప్ప వారికి చికిత్స చేయడం కష్టం. ఈ సూత్రాన్ని తూ.చా తప్పకుండా పాటించాడో వైద్యుడు. ఇంకా వినూత్నంగా ఆలోచించి పాటపాడుతూ ఆరోగ్య పరీక్షలు చేశాడు.

అమెరికాకు చెందిన షానోన్‌ వెమిస్‌ అనే మహిళ తన కూతుర్ని వైద్య పరీక్షల నిమిత్తం ఆసుపత్రికి తీసుకెళ్లింది. నెలల వయసున్న ఆ చిన్నారికి రక్త పరీక్షలు చేయాల్సి వచ్చింది. రక్త నమూనా సేకరించేటప్పుడు చిన్నారికి నొప్పి కలగకుండా ఉండేందుకు డాక్టర్‌ రేయాన్‌ కోట్జీ వినూత్నంగా ఆలోచించాడు. పాట పాడుతూ రక్త నమూనా సేకరించాడు. రేయాన్‌ పాడుతుండగా ఆ చిన్నారి కూడా ఆయనవైపు తదేకంగా చూస్తూ ఉండిపోయింది. దీనికి సంబంధించిన వీడియోను చిన్నారి తల్లి షానోన్‌ ఫేస్‌బుక్‌లో పోస్ట్‌ చేసింది. దీంతో ఇది విపరీతంగా వైరల్‌ అవుతోంది. వైద్యుడిపై నెటిజన్లు ప్రశంసలు కురిపిస్తున్నారు.