చెన్నై: ‘బిచ్చగాడు’ చిత్రంతో తెలుగు ప్రేక్షకులకు మరింత దగ్గరయ్యారు నటుడు విజయ్‌ ఆంటోని. ఈ సినిమాతో ఆయన అటు కోలీవుడ్‌తోపాటు ఇటు టాలీవుడ్‌లో కూడా మంచి గుర్తింపు తెచ్చుకున్నారు. ప్రస్తుతం విజయ్‌ కథానాయకుడిగా తమిళంలో తెరకెక్కుతున్న చిత్రం ‘అగ్ని సిరగుల్‌’. ఈ సినిమాని తెలుగులో ‘జ్వాల’ పేరుతో విడుదల చేయనున్నారు. తాజాగా ఈ సినిమా ఫస్ట్‌లుక్‌ను చిత్రబృందం విడుదల చేసింది. నవీన్‌ దర్శకత్వం వహిస్తున్న ఈ సినిమాలో అక్షర హాసన్‌ కథానాయికగా నటిస్తున్నారు. విజయ్‌ ఆంటోనీ శీను అనే పాత్రలో కనిపించనున్నారు. యాక్షన్‌ నేపథ్యంలో తెరకెక్కుతున్న ఈ సినిమాలోని చాలా సన్నివేశాలను మాస్కో, రష్యా, కజకిస్థాన్‌ ప్రాంతాల్లో చిత్రీకరించనున్నారు. ప్రకాష్‌ రాజ్‌, అరుణ్‌ విజయ్‌ కీలకపాత్రలు పోషిస్తున్నారు. నటరాజన్‌ శంకరన్‌ సంగీత దర్శకుడిగా వ్యవహరిస్తున్నారు.