ఇటీవల ఓ భారతీయ కుటుంబం బాలి పర్యటనకు వెళ్లింది. నాలుగు రోజులు సరదాగా గడిచిపోయాయి. వస్తూ వస్తూ బస చేసిన హోటల్‌ గదిలోని వస్తువులను తమ బ్యాగుల్లో సర్దేసి తిరుగు ప్రయాణమైంది. ఈ వీడియో కాస్తా సోషల్‌ మీడియాలో వైరల్‌ అయింది. ట్రావెలోకంలో భారతీయ పర్యాటకులపై రకరకాల వ్యాఖ్యానాలు మొదలయ్యాయి. ‘ఏ దేశమేగినా.. మనజాతి గౌరవం నిలపాల’ని పెద్దల సందేశం. విదేశీ పర్యటనలకు వెళ్లే భారతీయుల కోసం విదేశీ వ్యవహారాల మంత్రిత్వ శాఖ కొన్ని సూచనలు చేసింది. అవేంటంటే..
* పర్యటించే దేశం సంప్రదాయాలను ముందుగానే తెలుసుకోవాలి.
* ఆయా దేశాలకు చెందిన సమాచారం, పర్యాటక విశేషాల గురించి అవగాహన ఉండాలి.
* ఆ దేశాల్లో నిషేధిత వస్తువులు ఏమిటో తెలిసుండాలి.
* వస్త్రధారణ విషయంలో స్థానిక విశ్వాసాలను గౌరవించాలి.
* మన దేశంలో మంచి అర్థాన్ని ఇచ్చే సంజ్ఞలు విదేశాల్లో చెడుగా అనిపించొచ్చు. గమనించుకోవాలి.
* దొంగతనానికి పాల్పడటం, మాదక ద్రవ్యాలు తీసుకోవడం, అనవసరమైన చర్చల్లో పాల్గొనడం చేయకూడదు.
* స్థానిక చట్టాలను తెలుసుకోవడం మంచిది.
* బస చేసిన హోటల్‌ సిబ్బంది, కారు డ్రైవర్లతో మర్యాదగా మాట్లాడాలి.
* మన దుష్ప్రవర్తన మన సంస్కృతికి చెడ్డపేరు తెస్తుందని మరచిపోవద్దు.