భార్యాపిల్లలను వదిలేసి వెళ్లిపోయాడు

కౌలాలంపూర్: పబ్‌జి ఆన్‌లైన్‌ గేమ్ చాలా వేగంగా ప్రాచుర్యం పొంది, అంతేవేగంగా ప్రజల్లోకి చొచ్చుకుపోయింది. ఒకసారి ఆ ఆట వ్యసనంగా మారితే వదిలించుకోవడం కష్టంగా మారినట్లు ఎన్నో వార్తా కథనాల ద్వారా వెల్లడవుతోంది. తాజాగా దీనికి సంబంధించి ఓ ఫేస్‌బుక్‌ పోస్ట్ వైరల్‌గా మారింది. పబ్‌జి ఆటకు బానిసగా మారిన ఓ వ్యక్తి నాలుగు నెలల గర్భిణిగా ఉన్న తన భార్యను, బిడ్డను వదిలేశాడు. మలేసియాకు చెందిన వ్యక్తి ఈ నిర్వాకానికి పాల్పడ్డాడు. తన ఆటకు వారి వల్ల ఎటువంటి ఇబ్బంది కలగకూడదని వారికి దూరంగా వెళ్లాడు. ఈ విషయాన్ని అతడి భార్య ఫేస్‌బుక్ పోస్ట్ ద్వారా వెల్లడించింది.  ‘అతడు మమ్మల్ని వదిలి నెల రోజులు కావొస్తుంది. మొదట్లో ఈ ఆట ఆడే ముందు బాగానే ఉండేవాడు. కానీ దానికి బానిసగా మారిన దగ్గరి నుంచి రాత్రిళ్లు నిద్రపోవడం కూడా మానేశాడు. పొద్దున్నే లేచేవాడు కాదు. తన పనులు, వ్యాపారాన్ని పట్టించుకోవడం మానేశాడు. దానిపై నేను గట్టిగా మాట్లాడితే భర్తకు ఏ మాత్రం మద్దతు తెలపని భార్యగా నిందించేవాడు’ అని ఆమె ఫేస్‌బుక్‌ పోస్ట్‌లో వాపోయింది. 

భారత్‌లో కూడా పబ్‌జి ఆటపై అనేక మంది ఆందోళన వ్యక్తం చేస్తున్నారు.  అన్ని ప్రాథమిక పాఠశాలల్లో ఈ ఆటను నిషేధించాలని గుజరాత్ ప్రభుత్వం ఆదేశాలు జారీచేసింది. వెల్లూరు ఇనిస్టిట్యూట్ ఆఫ్ టెక్నాలజీలో కూడా ఈ ఆటను నిషేధించారు. తాజాగా పబ్‌జి ఆట ఆడటానికి స్మార్ట్‌ ఫోన్‌ ఇవ్వలేదని ముంబయికి చెందిన 18 ఏళ్ల కుర్రాడు ఆత్మహత్యకు పాల్పడిన సంగతి తెలిసిందే.