close

తాజా వార్తలు

బీమా లెక్క.. సరిపోయిందా?

జీవిత బీమా పాలసీ తీసుకోవాలని అనుకునే వారికి.. ఎదురయ్యే మొదటి సందేహం.. ఎంత మొత్తానికి పాలసీ తీసుకోవాలి అనేది. ఇది ఎప్పుడూ ఓ చిక్కు ప్రశ్నే. ఒక వ్యక్తికి ఎంత బీమా ఉంటే ధీమాగా ఉంటారనే విషయాన్ని కచ్చితంగా లెక్కించడం అంత తేలికేమీ కాదు. కానీ.. కొన్ని ప్రధాన అంశాలను పరిగణనలోనికి తీసుకొని, ఎంత మొత్తం విలువైన పాలసీ తీసుకుంటే మంచిదనేది తెలుసుకునే ప్రయత్నం చేయాలి.

కుటుంబంలో మీరు ఒక్కరే ఆర్జించే వ్యక్తా? మీపై ఆధారపడిన వారు ఉన్నారా? ఎలాంటి సందేహం లేకుండా మీకు జీవిత బీమా పాలసీ అవసరమే. అనుకోనిది ఏదైనా జరిగినప్పుడు అతను/ఆమె మీద ఆధారపడిన వారికి ఆర్థికంగా ఇబ్బంది కలగకుండా చూడటం బీమా పాలసీ ప్రధాన లక్ష్యం. ఉన్న బాధ్యతలు, కుటుంబ లక్ష్యాలు, కుటుంబ ప్రస్తుత జీవన శైలికి ఇబ్బంది కలగకుండా చూసుకోవడంలాంటివన్నీ బీమా పాలసీతోనే సాధ్యం. తనపై ఆధారపడిన జీవిత భాగస్వామి, పిల్లలు, ఆధారపడిన తల్లిదండ్రులందరికీ మీరు లేనప్పుడు ఈ బీమా పాలసీలే ఆధారంగా మారతాయి.

ఒక వ్యక్తి లేని లోటును తీర్చడం ఎవరి వల్లా కాదు. ఆ వ్యక్తి ఆర్థిక విలువకు ప్రత్యామ్నాయంగా మాత్రమే బీమా ఉపయోగపడుతుంది. పాలసీదారుడు మరణించినప్పుడు.. పాలసీ ద్వారా వచ్చిన డబ్బు ఆ వ్యక్తి ఆదాయానికి ప్రత్యామ్నాయంగా మారుతుంది. కాబట్టి, నాకు బీమా పాలసీ అవసరమా? అనే ప్రశ్నకు సమాధానం.. ఒక్కటే.. కుటుంబానికి ఆర్థిక రక్షణ కావాలంటే.. బీమా తీసుకోవాల్సిందే.

ఎక్కువగా ఉన్నా నష్టమే.. 
కావాల్సిన మొత్తం కన్నా బీమా తక్కువ ఉంటే.. అది కుటుంబ ఆర్థిక అవసరాలను తీర్చలేకపోవచ్చు. అదే.. అవసరానికి మించి ఉంటే.. ప్రీమియం భారం అవుతుంది. అందుకే, బీమా పాలసీని సరైన మొత్తానికి తీసుకోవాలి. 
వయసు, ఆదాయాన్ని బట్టి, పాలసీ విలువ వార్షికాదాయానికి 10, 15, 20 రెట్లు ఉండాలి. సాధారణంగా ప్రతి వ్యక్తికీ ఈ సూత్రం వర్తిస్తుంది. ప్రస్తుతం ఉన్న ఆర్థిక పరిస్థితుల నేపథ్యంలో ఈ మొత్తం కూడా సరిపోకపోవచ్చు. ఈ నిబంధనతోపాటు.. కుటుంబ బాధ్యతలు, అప్పులు, ఇతర లక్ష్యాలనూ పరిగణనలోనికి తీసుకొని బీమా పాలసీని నిర్ణయించుకోవడం ఎప్పుడూ అవసరం.

అవసరాల ఆధారంగా..

క్కో వ్యక్తి ఆర్థిక అవసరాలు ఒక్కో విధంగా ఉంటాయి. బీమా మొత్తాన్ని నిర్ణయించేప్పుడు వీటినీ ప్రధానంగా లెక్కలోకి తీసుకోవాలి. ఆర్థిక పరిస్థితులను పూర్తిగా విశ్లేషిస్తేనే కచ్చితమైన బీమా మొత్తం గణించగలం. అప్పులు, ఆదాయం, తనఖాలు, చదువు.. సాధారణంగా ఈ నాలుగు అంశాలే జీవిత బీమా మొత్తాన్ని నిర్ణయిస్తాయి. ఇదంతా ఎందుకంటే.. ఒక వ్యక్తిపై ఆధారపడిన వారి ప్రతి అవసరమూ.. తాను లేనప్పుడూ తీరాలి. ముఖ్యంగా కుటుంబంలో ఒక్కరే ఆదాయాన్ని ఆర్జిస్తున్నప్పుడు ఇది తప్పనిసరిగా పాటించాల్సిందే.

అప్పులు తీర్చేలా.. 
ఒక వ్యక్తి హఠాత్తుగా మరణించాడనుకుందాం.. అప్పటికప్పుడు అతను తీర్చాల్సిన అప్పుల జాబితా ఏమిటి? అనేది చూడాలి. ఒక వ్యక్తి ఆస్తులకు సంబంధించిన వివరాలను సరిగా లెక్క చూడకపోయినా ఇబ్బంది లేదు.. కానీ, అప్పులను గణించడంలో పొరపాటు చేస్తే నికర విలువను అంచనా వేయడం కష్టమే. ఆ వ్యక్తి లేనప్పుడు ఆ కుటుంబాన్ని ఇది చాలా ఇబ్బందులపాలు చేస్తుంది. ఇది ఏ వ్యక్తీ కోరుకోడు.

మీకు ఉన్న ప్రతి అప్పునూ.. జీవిత బీమా పాలసీని లెక్కించేందుకు పరిగణనలోనికి తీసుకోవాలి. దీనివల్ల మీ కుటుంబానికి ఆ అప్పుల నుంచి ఒక రక్షణ లభిస్తుంది. ఉదాహరణకు మీరు కారు రుణం రూ.10లక్షలు తీసుకున్నారు.. గృహరుణం రూ.50లక్షలు తీసుకున్నారనుకోండి.. అప్పుడు రూ.60లక్షల అప్పు ఉన్నట్లు. జీవిత బీమా పాలసీని తీసుకునేప్పుడు కచ్చితంగా ఇంతకు తక్కువగా మాత్రం ఉండకూడదు.

ఆదాయానికి ప్రత్యామ్నాయం.. 
జీవిత బీమా పాలసీల ప్రధాన లక్ష్యం.. ఒక వ్యక్తి లేనప్పుడు.. ఆ వ్యక్తి ద్వారా వచ్చే ఆదాయానికి ప్రత్యామ్నాయం చూపడం. జీవిత భాగస్వామి గృహిణిగా ఉండి, పిల్లలు ఇంకా చదువుకునే దశలోనే ఉన్నప్పుడు క్రమం తప్పని ఆదాయం లేకపోతే ఎంత ఇబ్బందో మాటల్లో చెప్పలేం. కుటుంబ ఆర్థిక పరిస్థితి, అవసరాల ఆధారంగా వారికి నెలకు ఎంత మొత్తం కావాలన్నది పరిశీలించండి. ఇలా ఎన్నేళ్లు ఆ ఆదాయం కొనసాగాలి అనేది చూసుకోవాలి. అప్పుడే సరైన మొత్తం ఎంత అనేది తేలుతుంది.

గృహరుణం తీసుకున్నారా? 
ఇల్లు కొనాలంటే గృహరుణం తీసుకోవడం తప్పనిసరి. ఇది సాధారణంగా 20-30 ఏళ్లు కొనసాగే దీర్ఘకాలిక అప్పు. ఈ మధ్యలో గృహరుణం తీసుకున్న వ్యక్తి మరణిస్తే.. దానికి వాయిదాలు చెల్లించడం ఇబ్బందే. దీన్ని నివారించేందుకు లోన్‌ కవర్‌ టర్మ్‌ పాలసీల్లాంటివి ఎంచుకోవాలి. జీవిత బీమాకు ఇది అదనంగా ఉండేలా చూసుకోవాలి. ఈ మార్టిగేజ్‌ ఇన్సూరెన్స్‌ ద్వారా రుణ మొత్తం పూర్తిగా చెల్లించాక.. జీవిత బీమా పాలసీ కుటుంబ ఆర్థిక అవసరాలకు ఉపయోగపడుతుంది.

చదువు ఆగకుండా..

లాంటి పరిస్థితులు ఎదురైనా పిల్లల చదువులు ఆగిపోవద్దనేది మన లక్ష్యంగా ఉంటుంది. అదే సమయంలో చదువుల ఖర్చులూ బాగా పెరుగుతున్నాయి. ఈ రెండింటినీ దృష్టిలో పెట్టుకొని జీవిత బీమా పాలసీని ఎంచుకోవాలి. పాలసీని ఎంచుకునేప్పుడు వారి చదువు పూర్తయ్యే సరికి ఎంత మొత్తం అవసరం అవుతుంది? అనేది విశ్లేషించాలి. ఆ మొత్తానికి తగిన రక్షణ ఉండేలా జాగ్రత్తపడాలి. ఇద్దరు పిల్లలు ఉన్నప్పుడు.. ఒక్కొక్కరికి కనీసం రూ.20లక్షల వరకూ చదువులకు కేటాయించేలా పాలసీ విలువ ఉండాలి.
- సంతోష్‌ అగర్వాల్‌, చీఫ్‌ బిజినెస్‌ ఆఫీసర్‌, Policybazaar.com

Tags :

క్రైమ్

రాజకీయం

జనరల్‌

సినిమా

స్పోర్ట్స్

బిజినెస్‌

జాతీయ-అంతర్జాతీయ

జిల్లా వార్తలు

దేవతార్చన

+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.