నల్లకుంట: హైదరాబాద్‌లో జరిగిన బోనాల ఉత్సవాల్లో అనూహ్య ఘటన చోటుచేసుకుంది. నల్లకుంట పోలీస్‌ స్టేషన్‌ పరిధి విద్యానగర్‌ టీఆర్టీ కాలనీలో ఆదివారం బోనాల ఉత్సవాలు జరిగాయి. అయితే ఉత్సవాల్లో భాగంగా భక్తులు ఫలహారాల బండి ఊరేగింపు నిర్వహించారు. ఈ ఊరేగింపులో విధులు నిర్వహిస్తున్న నల్లకుంట ఎస్సై మహేందర్‌ భక్తులనుద్దేశించి మాట్లాడుతూ ఆలస్యమవుతోంది.. త్వరగా కార్యక్రమాన్ని ముగించాలని సూచిస్తూ ముందుకెళ్తుండగా అక్కడే నృత్యం చేస్తున్న ఓ ఆకతాయి ఎస్సైను ముద్దు పెట్టుకున్నాడు. దీంతో ఎస్సై అతడి చెంప చెళ్లుమనిపించారు. ఈ సన్నివేశాన్ని గమనించినవారు ఒక్కసారిగా అవాక్కయ్యారు. విధులకు ఆటంకం కలిగించాడనే నేరం కింద పోలీసులు ఆ యువకుడిపై కేసు నమోదు చేశారు. ప్రస్తుతం అతడి ఆచూకీ కోసం గాలిస్తున్నట్లు పోలీసులు తెలిపారు.