ముహూర్తం సాయంత్రం 4 గంటలకు

హైదరాబాద్‌:  తెలంగాణ రాష్ట్ర మంత్రివర్గ విస్తరణ ఈరోజు సాయంత్రం 4 గంటలకు జరగనుంది. మంత్రివర్గంలో కొత్తగా ఆరుగురికి చోటుదక్కింది. జిల్లాలు, సమాజిక సమీకరణల ఆధారంగా పేర్లను ఖరారు చేశారు. అనుభవజ్ఞులకు అవకాశం కల్పించారు. రాష్ట్రం ఏర్పడిన అనంతరం తొలిసారిగా ఇద్దరు మహిళలకు మంత్రివర్గంలో చోటు దక్కింది. మంత్రులుగా తెరాస కార్యనిర్వాహక అధ్యక్షుడు కేటీఆర్‌తో పాటు హరీశ్‌రావు (సిద్దిపేట), సబితారెడ్డి (మహేశ్వరం), సత్యవతి రాఠోడ్‌ (వరంగల్‌ ఎమ్మెల్సీ), గంగుల కమలాకర్‌ (కరీంనగర్‌), పువ్వాడ అజయ్‌కుమార్‌ (ఖమ్మం) ప్రమాణస్వీకారం చేయనున్నారు. 

ఈ మేరకు రాజ్‌భవన్‌లో కొత్త మంత్రుల ప్రమాణ స్వీకారానికి అన్ని ఏర్పాట్లు చేశారు. కొత్త గవర్నర్‌గా ప్రమాణస్వీకారం చేసిన తమిళిసై సౌందరరాజన్‌కు కూడా మంత్రివర్గ విస్తరణపై సమాచారాన్ని సీఎం తెలియజేశారు.