మద్యం మత్తులోనే ప్రమాదమని ప్రచారం
 ఆవేదనతో రవాణాశాఖ ఇన్‌స్పెక్టర్‌ మృతి

బెంగళూరు (శివాజీనగర): వాస్తవాలేంటో తెలియకుండా సామాజిక మాధ్యమాల్లో పెట్టిన పోస్టులు.. రవాణాశాఖ ఇన్‌స్పెక్టర్‌ మృతికి కారణమయ్యాయి. బెంగళూరు ఎలక్ట్రానిక్‌ సిటీ వద్ద మంజునాథ్‌ నడుపుతున్న కారు ఓ ఆటోను ఢీకొట్టడంతో.. ఆటోడ్రైవర్‌ చేయి విరిగింది. స్థానికులు అతడికి సాయం చేయాల్సింది పోయి చరవాణుల్లో చిత్రాలు తీసుకున్నారు. మంజునాథ్‌ మద్యంతాగి ప్రమాదానికి కారణమయ్యారంటూ ఎవరికి వారు సామాజిక మాధ్యమాల్లో పోస్ట్‌ చేశారు. దీంతో ట్రాఫిక్‌ పోలీసులు ఆయనపై కేసు నమోదుచేసి, వైద్యపరీక్షలు చేయించగా.. అసలు ఆయనకు మద్యం అలవాటే లేదని తేలింది. లోబీపీతో ఇబ్బందిపడుతున్న ఆయనకు సెలవు దొరకలేదు. చిత్రాలు, వీడియోలు వైరల్‌ కావడంతో.. మానసికవ్యథతో శుక్రవారం రాత్రి కన్నుమూశారని కుటుంబసభ్యులు వాపోయారు.