హైదరాబాద్‌: హుజూర్‌నగర్‌లో తెరాస గెలుపు నల్లేరుపై నడకేనని మంత్రి జగదీశ్వర్ రెడ్డి ధీమా వ్యక్తంచేశారు. పోలింగ్ సమీపించాక తమకు మెజార్టీ ఎంతనేది చెప్పగలమని వ్యాఖ్యానించారు. తమకు పోటీ కాంగ్రెస్‌తోనేనని అన్నారు. భాజపా ప్రభావం ఉండదని చెప్పారు. తెరాసను గెలిపించేందుకు ప్రజలు సిద్ధంగా ఉన్నారని వెల్లడించారు. ఈ మేరకు అసెంబ్లీ లాబీలో ఆయన మీడియా ప్రతినిధులతో ఇష్టాగోష్ఠిగా మాట్లాడారు. పార్లమెంట్ ఎన్నికల ఫలితాలతో సంబంధం ఉండదని, అసెంబ్లీ, స్థానిక సంస్థల ఫలితాలు పునరావృతం అవుతాయని జగదీశ్‌ రెడ్డి అన్నారు. కాంగ్రెస్‌ నేతల ఐక్యత పీతల కలయిక వంటిదని ఎద్దేవా చేశారు. జిల్లా కాంగ్రెస్ నేతలందరూ కలిసి వచ్చినా తమ గెలుపును ఆపలేరన్నారు. పార్లమెంట్ ఎన్నికల అనుభవాలను దృష్టిలో ఉంచుకుని జాగ్రత్తలు తీసుకుంటామన్నారు. ఉత్తమ్‌కుమార్ రెడ్డి హుజూర్‌నగర్‌లో స్థానికేతరుడుగా చెప్పారు.