గుంటూరు నేరవార్తలు, న్యూస్‌టుడే: సహచర ఉద్యోగిని ఆటపట్టించేందుకు ఎస్పీ సంతకాన్ని ఫోర్జరీ చేసి చేతులారా చేటు తెచ్చుకున్నారు ఇద్దరు కానిస్టేబుళ్లు. కె.డేవిడ్‌రాజు, ఎం.గణేష్‌... గుంటూరు జిల్లా గురజాల సబ్‌డివిజన్‌ పరిధి దాచేపల్లి పోలీసుస్టేషన్‌లో కానిస్టేబుళ్లుగా పని చేస్తున్నారు. తమ తోటి కానిస్టేబుల్‌ జె.మల్లికార్జునరావును ఆటపట్టించేందుకు... నకిలీ బదిలీ ఉత్తర్వుల కాపీని తయారు చేశారు. దానిపై రూరల్‌ ఎస్పీ విజయరావు సంతకాన్ని ఫోర్జరీ చేసి, వాట్సప్‌ గ్రూపులో పోస్టు చేశారు. అది పలు గ్రూపుల్లో తిరిగి రూరల్‌ ఎస్పీ విజయరావు వాట్సప్‌నకు చేరింది. నిందితులపై క్రిమినల్‌ కేసులు నమోదు చేయాలని ఎస్పీ గురువారం ఆదేశించారు.