శ్రీనగర్‌: కశ్మీర్‌లోని అఖ్నూర్‌ సెక్టార్‌ సరిహద్దు నియంత్రణ రేఖ వద్ద ఆదివారం జరిగిన పేలుడులో ఒక జవాన్‌ మృతి చెందారు. మరో ఇద్దరు గాయాల పాలయ్యారు. రక్షణ శాఖ ప్రతినిధి తెలిపిన వివరాల ప్రకారం.. అఖ్నూర్‌ సెక్టార్‌లోని సరిహద్దు నియంత్రణ రేఖ సమీపంలోని పల్లన్‌వాలా ప్రాంతంలో జవాన్లు పెట్రోలింగ్‌ నిర్వహిస్తున్నారు. ఈ క్రమంలో అనుమానాస్పద ఐఈడీ పేలుడు చోటుచేసుకుంది. ఇందులో హవల్దార్‌ సంతోష్‌కుమార్‌ అనే జవాను మృతిచెందగా మరో ఇద్దరు గాయాలపాలయ్యారు. సంతోష్‌కుమార్‌ను అగ్రాలోని బదౌరియా ప్రాంతానికి చెందిన వ్యక్తిగా గుర్తించారు. గాయాలపాలైన వారిని ఆస్పత్రికి తరలించారు. వారిలో ఒకరి పరిస్థితి విషమంగా ఉన్నట్లు వెల్లడించారు. సరిహద్దులోని ఫెన్సింగ్‌ వద్ద పేలుడు చోటుచేసుకుందని అధికారులు తెలిపారు.