రాయదుర్గం (హైదరాబాద్‌): రాయదుర్గంలో ఓ సాఫ్ట్‌వేర్‌ ఇంజినీర్‌ ఆత్మహత్య చేసుకుంది. తనను ఉద్యోగం నుంచి తొలగిస్తూ ఓ సాఫ్ట్‌వేర్‌ సంస్థ నోటీసులు జారీ చేయడంతో తీవ్ర మనస్తాపానికి గురైన హరిణి (24) ఉరి వేసుకుని బలవన్మరణానికి పాల్పడింది. ఈ ఘటనపై రాయదుర్గం ఇన్‌స్పెక్టర్‌ రవీందర్‌ తెలిపిన వివరాల ప్రకారం.. గచ్చిబౌలి సైబర్‌హిల్స్‌లోని వసతిగృహంలో ఉంటున్న హరిణి మాదాపూర్‌లోని ఓ ఐటీ సంస్థలో సాఫ్ట్‌వేర్‌ ఇంజినీర్‌గా పనిచేస్తోంది. అదనపు సిబ్బందిని తొలగించే క్రమంలో ఆ సంస్థ కొంతమంది ఉద్యోగులకు నోటీసులు జారీ చేసింది. ఇందుకు డిసెంబర్‌ 1వ తేదీ వరకు గడువు విధించింది. నోటీసులు అందుకున్న వారిలో హరిణి కూడా ఉంది. ఇక్కడ ఉద్యోగం కోల్పోతే తనకు వేరే సంస్థలో ఉద్యోగం దొరుకుతుందో.. లేదో అన్న ఆందోళనతో మంగళవారం రాత్రి తాను ఉంటున్న వసతి గృహంలోని తన గదిలో ఉరి వేసుకుంది. మహబూబ్‌నగర్‌లోని జగదాంబనగర్‌ కాలనీకి చెందిన హరిణి బీటెక్‌ పూర్తి చేసుకుని రెండున్నరేళ్ల క్రితం హైదరాబాద్‌కు వచ్చింది. ఈ ఘటనపై కేసు నమోదుచేసి దర్యాప్తు చేస్తున్నట్టు రాయదుర్గం పోలీసులు తెలిపారు.