బస్సు నుంచి దూకేసి.. లారీ కిందపడి..

పూసపాటిరేగ: మనస్తాపంతో వేగంగా వెళ్తున్న బస్సు నుంచి దూకి ఓ వ్యక్తి ఆత్మహత్యకు పాల్పడ్డాడు. ఈ ఘటన విజయనగరం జిల్లా పూసపాటిరేగ సమీపంలో గురువారం ఉదయం చోటుచేసుకుంది. స్థానికులు, బస్సు సిబ్బంది తెలిపిన వివరాల ప్రకారం.. వైద్యపరీక్షల నిమిత్తం ఓ వ్యక్తి శ్రీకాకుళం నుంచి విశాఖపట్నానికి ఆర్టీసీ బస్సులో వెళ్తున్నాడు. పూసపాటిరేగ మండలం చోడమ్మ అగ్రహారం చేరుకునేసరికి ఆ వ్యక్తి ఒక్కసారిగా వెళ్తున్న బస్సులోంచి దూకేశాడు. దీంతో అదే మార్గంలో వెనుక నుంచి వస్తున్న లారీ అతడి తలపై నుంచి వెళ్లడంతో అక్కడికక్కడే మృతిచెందాడు. దూకే ప్రయత్నంలో బస్సులో ఉన్నవారు అతడిని ఆపేందుకు ప్రయత్నంచినా ఫలితం లేకపోయిందని కండక్టర్‌, ప్రయాణికులు తెలిపారు. సమాచారమందుకున్న పూసపాటిరేగ పోలీసులు కేసు నమోదు చేసి దర్యాప్తు చేస్తున్నారు. మృతుడి వివరాలు ఇంకా తెలియాల్సి ఉంది. మృతుడి వద్ద ఆరోగ్య పరీక్షల రిపోర్టులు ఉన్నాయి.