బెంగళూరు: మనీలాండరింగ్‌ కేసులో అరెస్టయిన కాంగ్రెస్‌ నేత, కర్ణాటక మాజీ మంత్రి డీకే శివకుమార్‌ కుమార్తె ఐశ్వర్యకు ఈడీ అధికారులు సమన్లు జారీ చేశారు. తన తండ్రి మనీలాండరింగ్‌ కేసు వ్యవహారంలో ఈ నెల 12న  దిల్లీలో జరిగే విచారణకు హాజరు కావాలని సూచించారు. శివకుమార్‌ ఆర్థికలావాదేవీలను పరిశీలిస్తున్న క్రమంలో ఆయన కుమార్తె నిర్వహిస్తున్న ట్రస్ట్‌కు సంబంధించిన పత్రాలు ఈడీ దృష్టికి వచ్చాయని ఈడీ అధికారి  ఒకరు వెల్లడించారు. ఆ ట్రస్ట్‌ కార్యకలాపాలు, ఆర్థిక లావాదేవీలపై వివరాలు తెలుసుకొనేందుకే ఆమెకు సమన్లు జారీచేసినట్టు తెలిపారు. 

మనీలాండరింగ్‌ కేసులో డీకేఎస్‌ను రెండు రోజుల పాటు దిల్లీలో విచారించిన ఈడీ అధికారులు ఈ నెల 3న ఆయనను అరెస్టు చేసిన విషయం తెలిసిందే. అనంతరం ఆయనను దిల్లీ కోర్టు ఆయనను పది రోజుల పాటు ఈడీ కస్టడీకి అప్పగించింది. నోట్ల రద్దు సమయంలో ఈడీ, ఐటీశాఖలు డీకేఎస్‌ ఆర్థిక వ్యవహారాలపై నిఘా వుంచాయి. ఈ క్రమంలోనే 2017 ఆగస్టు 2న దిల్లీలోని శివకుమార్‌ నివాసంలో ఐటీ శాఖ అధికారులు దాడులు చేసి రూ.8.59 కోట్ల మొత్తాన్ని స్వాధీనం చేసుకొని ఆయనతో పాటు పలువురు సన్నహితులపైనా కేసులు నమోదు చేశారు.