భువనేశ్వర్‌ అర్బన్‌ (ఒడిశా), న్యూస్‌టుడే:  ఆ గ్రామంలో బిక్షమెత్తుకుంటున్న ఓ అనాథ వృద్ధుడు చనిపోయాడు. అయితే గ్రామస్థులెవరూ అంత్యక్రియలకు ముందుకు రాలేదు. అలాంటి పరిస్థితుల్లో ఇద్దరు యువకులు ముందుకొచ్చి ఔదార్యం చాటారు. సైకిల్‌పై మృతదేహాన్ని తీసుకెళ్లి అంత్యక్రియలు నిర్వహించారు. ఒడిశా రాష్ట్రం అనుగుల్‌ జిల్లా రెంగాలి కొలని గ్రామంలో గిరిధారి గండొ భార్యతో కలిసి 40 ఏళ్లుగా ఉంటున్నాడు. రెండేళ్ల క్రితం భార్య మృతి చెందడంతో గిరిధారి ఒంటరివాడయ్యాడు. భిక్షమెత్తుకుంటూ జీవనం సాగిస్తున్నాడు. కొన్ని రోజుల క్రితం అనారోగ్యానికి గురైన గిరిధారి మంగళవారం సాయంత్రం మృతి చెందాడు.  గ్రామంలోని ఇద్దరు యువకులు శరత్‌ గండొ, శంకర్‌ మాఝి పోలీసులకు సమాచారం అందించారు. పోలీసులూ స్పందించకపోవడంతో వారే సైకిల్‌పై మృతదేహాన్ని శ్మశానానికి తీసుకెళ్లి గొయ్యి తవ్వి పూడ్చారు.