దేవీపట్నం: గోదావరిలో జరిగిన బోటు దుర్ఘటనలో గాలింపు చర్యలను నిలిపేశారు. తూర్పుగోదావరి జిల్లా కచ్చులూరు మందం వద్ద గాలింపును నిలిపివేసినట్లు అధికారులు ప్రకటించారు. వరద అధికంగా ఉండటంతో ఆపేసినట్లు తెలుస్తోంది. ముంబయి బృందం నివేదిక ఇవ్వకుండా పనులు చేపట్టలేమని ఉత్తరాఖండ్‌ నిపుణుల బృందం స్పష్టం చేయడంతో అధికారులు ఈ నిర్ణయం తీసుకున్నారు. మరోవైపు గాలింపు చేపట్టే ప్రాంతంలోకి ఎవర్నీ అనుమతించకుండా పోలీసులు 144 సెక్షన్‌ విధించారు. 

ఘటన జరిగినప్పుడు బోటులో 77 మంది ఉన్నారని మంత్రి కన్నబాబు శుక్రవారం తెలిపారు. వీరిలో 26 మంది సురక్షితంగా బయటపడ్డారని.. ఇప్పటి వరకు 35 మృతదేహాలను వెలికితీశామని చెప్పారు. మరో 16 మంది ఆచూకీ తెలియాల్సి ఉందని మంత్రి వివరించారు.