హైదరాబాద్‌: పోలీసు కానిస్టేబుల్‌ నియామక పరీక్షల మెరిట్‌ జాబితాను, కటాఫ్‌ మార్కులను తక్షణమే ప్రకటించాలని మల్కాజిగిరి ఎంపీ రేవంత్‌ రెడ్డి రాష్ట్ర ప్రభుత్వాన్ని డిమాండ్‌ చేశారు. ముఖ్యమంత్రి కేసీఆర్‌కు ఈ మేరకు ఆదివారం బహిరంగ లేఖ రాశారు. రాష్ట్ర ప్రభుత్వం నిర్వహించిన పోలీసు కానిస్టేబుళ్ల నియామక పరీక్షలో ఉత్తీర్ణులైన 90వేల మంది అభ్యర్థులు మెరిట్‌ జాబితా, కటాఫ్‌ మార్కుల కోసం వేచి చూస్తున్నారన్నారు. పోలీసు శాఖలో 16,926 పోస్టుల భర్తీకి గతేడాది మే నెలలో నోటిఫికేషన్‌ విడుదల చేసినా.. ఇప్పటి వరకు ప్రక్రియ పూర్తి చేయలేదని ఆందోళన వ్యక్తం చేశారు. 

ఈ పరీక్షకు హాజరైన నిరుద్యోగ యువత ప్రస్తుతం సొంత ఊళ్లకు వెళ్లలేక హైదరాబాద్‌లోనే ప్రైవేటు వసతి గృహాల్లో ఉంటూ ఆర్థికంగా ఇబ్బంది పడుతున్నట్లు తెలిపారు. ఫలితాల విషయంలో పోలీసు నియామక బోర్డును సంప్రదించినా, సహాయ కేంద్రం ద్వారా తెలుసుకునేందుకు యత్నించినా సరైన స్పందన రాలేదని బాధిత నిరుద్యోగులు ఆందోళన వ్యక్తం చేస్తున్నట్లు లేఖలో పేర్కొన్నారు. ఈ విషయం తన దృష్టికి రాగానే ట్విటర్‌ ద్వారా మంత్రి కేటీఆర్‌ దృష్టికి తీసుకెళ్లినా.. నెల గడిచినా సమాధానం లేదని వివరించారు. సమస్య తీవ్రతను అర్థం చేసుకుని తక్షణమే ఫలితాలు విడుదలకు ఆదేశించాలని కేసీఆర్‌కు విజ్ఞప్తి చేశారు.