ఒడిశా: మనిషి ఎలాగుంటేనేం? మనసు గొప్పదని చాటుకున్నారు... భువనేశ్వర్‌కు చెందిన ట్రాన్స్‌జెండర్‌ రాణి కిన్నర్‌! ఎన్నో అడ్డంకులు, అవమానాలు ఎదురైనా... ఆత్మవిశ్వాసంతో తన జీవితాన్ని తానే నిర్మించుకున్నారు. ఉబర్‌ డ్రైవరుగా చేరి, ఫైవ్‌స్టార్‌ రేటింగ్‌ సాధించారు. చాలామంది ట్రాన్స్‌జెండర్ల మాదిరే రాణి కూడా మొదట రైళ్లలో యాచించేవారు. కానీ ఒక రోజు అంతర్మథనం మొదలైంది. ‘ఏంటీ జీవితం! నేనెందుకిలా బతకాలి? అందరిలా కష్టపడి ఎందుకు బతకకూడదు?’ అని ఆలోచన వచ్చింది. అలా ఓ చికెన్‌ ఫాంలో చిన్న ఉద్యోగం సంపాదించారు రాణి. తర్వాత డ్రైవింగ్‌పై మక్కువతో ఆటో నడపడం నేర్చుకున్నారు. కానీ... తన ఆటోలో కూర్చుని ప్రయాణించేందుకు చాలామంది మొగ్గు చూపేవారు కాదు. దీంతో రాణి ఉబర్‌ క్యాబ్స్‌లో డ్రైవర్‌గా చేరారు. తన చోదక నైపుణ్యంతో ప్రయాణికుల నుంచి ఫీడ్‌బ్యాక్‌ రూపంలో ఫైవ్‌స్టార్‌ రేటింగ్‌ సాధించారు. తనలా గౌరవంగా బతికేందుకు ఎంతోమంది ట్రాన్స్‌జెండర్లను ప్రోత్సహిస్తున్నారు కూడా!