హైదరాబాద్: ఆర్టీసీ కార్మికులు ప్రభుత్వం విధించిన డెడ్‌లైన్లకు భయపడొద్దని తెలంగాణ ఆర్టీసీ ఐకాస పిలుపునిచ్చింది. సమ్మె యథాతథంగా కొనసాగుతుందని స్పష్టం చేసింది. కార్మికులు ధైర్యంగా ఉండాలని..అంతిమ విజయం కార్మికులదేనని స్పష్టం చేసింది. ఈ మేరకు ఐకాస నాయకులు ఓ ప్రకటన విడుదల చేశారు. కార్మికులెవ్వరూ యాజమాన్యానికి లేఖలు ఇవ్వొద్దని అందులో పేర్కొన్నారు. ఈ నెల 7న హైకోర్టు ఇవ్వబోయే తీర్పు కార్మికులకు అనుకూలంగా ఉండొచ్చని వారు అభిప్రాయపడ్డారు.

డిపో మేనేజర్‌పై దాడితో సంబంధం లేదు:ఆర్టీసీ ఐకాస

ఇవాళ ఉదయం నిర్మల్‌ జిల్లా భైంసాలో ఆర్టీసీ డిపో మేనేజర్‌ జనార్దన్‌పై గుర్తు తెలియని దుండగులు దాడి చేసిన విషయం తెలిసిందే. ఈ ఘటనలో ఆయకు స్వల్పగాయాలు కాగా..దగ్గర్లోని ప్రభుత్వ ఆస్పత్రికి తరలించి చికిత్స అందిస్తున్నారు. అయితే ఈ దాడిని ఆర్టీసీ ఐకాస ఖండించింది. జానర్దన్‌పై ఆర్టీసీ కార్మికులు దాడి చేయలేదని, దీంతో తమకు ఎలాంటి సంబంధం లేదని స్పష్టం చేసింది.