దిల్లీ: గత కొన్ని సంవత్సరాలుగా తమకు భద్రతగా నిలిచిన ప్రత్యేక రక్షణ బృందం (ఎస్‌పీజీ) సిబ్బందికి కాంగ్రెస్‌ అగ్రనేత రాహుల్‌ గాంధీ ధన్యవాదాలు తెలిపారు. గాంధీ కుటుంబానికి ఎస్‌పీజీ భద్రతను తొలగిస్తూ కేంద్రం తీసుకున్న నిర్ణయం నేపథ్యంలో ఆయన ట్వీట్‌ చేశారు. ‘‘నన్ను, నా కుటుంబ సభ్యులకు గత కొన్నేళ్ల పాటు అవిశ్రాంతంగా భద్రత కల్పించిన సోదరులు/ సోదరీమణులకు నా కృతజ్ఞతలు’’ అని పేర్కొన్నారు. సిబ్బంది తమకు ఎంతో అంకిత భావంతో అవిశ్రాంతంగా సేవలందించారని కొనియాడారు. తమతో ఎంతో ఆప్యాయతతో ఉంటూ మద్దతుగా నిలిచినందుకు కృతజ్ఞతలు చెప్పారు. అందరికీ మంచి జరగాలని కోరుకుంటున్నానని రాహుల్‌ అన్నారు.