close

తాజా వార్తలు

త్రిసభ్య కమిటీ నివేదిక సమర్పణలో వాయిదాలు

గ్లోబరినా తప్పులు కప్పిపుచ్చే ప్రయత్నాలు జరుగుతున్నాయని ఆరోపణలు


హైదరాబాద్‌:  ఇంటర్‌ ఫలితాల ప్రక్రియపై సమగ్ర దర్యాప్తు చేసిన త్రిసభ్య కమిటీ నివేదికను నీరుగార్చే ప్రయత్నం జరుగుతుందన్న ఆరోపణలు వినిపిస్తున్నాయి. మూడు రోజుల్లో  కమిటీ నివేదిక సమర్పించాల్సి ఉండగా..వాయిదాలు పడుతుండడంపై అనుమానాలు  వ్యక్తమవుతున్నాయి. అధికారుల ఒత్తిడితో కొంత తీవ్రత తగ్గినట్లు కూడా తెలుస్తోంది. గ్లోబరినా తప్పులు కప్పిపుచ్చేందుకు మార్పులు చేసినట్లు విశ్వసనీయ సమాచారం.

దర్యాప్తులో భాగంగా కమిటీ సభ్యులు అనేక కీలక లోపాలను గుర్తించి వాటిని నివేదికలో పొందుపరిచినట్లు సమాచారం. టెండర్‌ నిబంధనల ప్రకారం గ్లోబరినా సంస్థ అర్హత సాధించలేదని.. ఈ సంస్థతో బోర్డు న్యాయపరమైన ఒప్పందాలు పూర్తి చేయలేదని వారు గుర్తించారు. గ్లోబరినా సరైన సాఫ్ట్‌వేర్‌ను రూపొందించకపోవడం కారణంగా పరీక్షల రుసుములు కట్టడంలోనూ అవకతవకలు జరిగాయి. ఓ కళాశాలకు చెందిన ప్రిన్సిపాల్‌ తమ విద్యార్థుల పరీక్ష ఫీజు కోసం ఆన్‌లైన్‌లో రూ.15 లక్షలు చెల్లించినప్పటికీ ఆ వివరాలు సర్వర్‌లో నమోదు కాలేదు. ఇలా పరీక్ష రుసుము చెల్లించినా నమోదు కాక అనేక మంది ఇబ్బందులకు గురయ్యారు. గతేడాది ఇంటర్‌ మొదటి సంవత్సరం చదివిన విద్యార్థుల వివరాలు సీజీజీ సంస్థ నుంచి తీసుకుని తాము రూపొందించిన సాఫ్ట్‌వేర్‌లోకి నమోదు చేయడంలోనూ పొరపాట్లు జరిగినా బోర్డు, గ్లోబరినా ఏమాత్రం పట్టించుకోలేదు. ఇలాంటి పలు సమస్యల వల్ల సెప్టెంబర్‌లో రూపొందించాల్సిన నామినల్‌ రోల్స్‌ పూర్తయ్యేసరికి జనవరి వచ్చింది.

ఈ అవకతవకలు బయటపడకుండా ఉండేందుకు ఉన్నతాధికారుల నుంచి ఒత్తిడి తీసుకువచ్చినట్లు తెలుస్తోంది. నివేదికలో తీవ్రమైన పదాలు లేకుండా చూడాలని బలవంతం చేసినట్లు విశ్వసనీయ సమాచారం. నివేదికతోపాటు జతచేసిన 21 అనుబంధాలను 11కు తగ్గించారు. తుది నివేదికలోని ప్రతి పేజీపై ముగ్గురు సభ్యులు సంతకాలు చేసి సీల్డ్‌ కవర్‌లో ఉంచారు. ఈ ప్రక్రియ పూర్తయ్యేసరికి గురువారం రాత్రి అవ్వడంతో సమర్పణను శుక్రవారం ఉదయానికి వాయిదా వేసుకున్నారు. శుక్రవారం మరోసారి కొంతమంది ఉన్నతాధికారులు నివేదికలో తీవ్రత తగ్గించాలని కొన్ని అంశాలను తొలగించాలని సభ్యులపై ఒత్తిడి తీసుకువచ్చారు. గ్లోబరినా టెండరు అనర్హతలపై నివేదిక నుంచి పేర్కొన్న అంశాలను తొలగించారని విశ్వసనీయ సమాచారం. అప్పటికే ప్రభుత్వ రంగ సంస్థ సీజీజీ పొరపాట్లు లేకుండా ఈ ప్రక్రియ నిర్వహిస్తుండగా.. ఓ ప్రైవేటు సంస్థకు పనులు అప్పగించడంపై కమిటీ సభ్యులు విస్మయం వ్యక్తంచేశారు. సభ్యులపై ఒత్తిడి చేసి దీన్ని కూడా నివేదికలో బోర్డుకు అనుకూలంగా రాయించుకున్నారని సమాచారం. గ్లోబరినా తన ప్రత్యర్థి కంటే ఎక్కువ మొత్తంలో బిడ్‌ చేసినా ఉద్దేశపూర్వకంగా తక్కువ  చూపించి బాధ్యతలు అప్పగించారని కమిటీ గుర్తించింది. అంశాన్ని నివేదికలో ఎక్కడా ప్రస్తావించనివ్వలేదని సమాచారం. సోమవారం పని ప్రారంభించిన కమిటీకి ఇంటర్‌బోర్డు అధికారుల నుంచి సహాయ నిరాకరణే ఎదురైనట్లు సమాచారం. కమిటీ సభ్యులు తీవ్రంగా స్పందించడంతో వారు కోరిన సమాచారాన్ని బుధవారం అందించారు. సమాచార సేకరణకు ఆలస్యం కావడంతో నివేదిక గురువారం వచ్చేలా అనుమతి తీసుకున్నారు. తిరిగి శనివారానికి వాయిదా పడడంపై అనేక సందేహాలు వ్యక్తమవుతున్నాయి.

 

 


Tags :

జనరల్‌

రాజకీయం

సినిమా

క్రైమ్

స్పోర్ట్స్

బిజినెస్‌

జాతీయ-అంతర్జాతీయ

జిల్లా వార్తలు
ఛాంపియన్

దేవతార్చన

+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.