సూర్యాపేట: మునగాల మండల కేంద్రంలో సోమవారం ప్రతి ఇంటా చేపల కూరే. ఆశ్చర్యంగా ఉంది కదూ! మునగాల చెరువులో గుత్తేదారు నల్లపాటి శ్రీనివాస్‌ చేపలను పట్టారు. వాటిని విక్రయించేందుకు మార్కెట్‌కు తీసుకెళ్లకుండా గ్రామంలోని రేషన్‌ కార్డుదారులందరికీ రెండు కిలోల చొప్పున ఉచితంగా పంపిణీ చేశారు. గ్రామంలో సుమారు 2500 పైచిలుకు కార్డుదారులు ఉన్నారు. ముందుగా కార్డుదారులకు కూపన్‌ ఇచ్చారు. దాన్ని చూపించిన వారికి చేపలను పంచారు. దాదాపు నాలుగున్నర టన్నుల చేపలను ఇలా పంపిణీ చేశారు. గ్రామస్థులందరికీ ఉచితంగా అందించిన తర్వాతే మిగిలిన చేపలను విక్రయించాలనుకున్నట్లు శ్రీనివాస్‌ ‘ఈనాడు’తో అన్నారు.