ఏం చేయాలి

ఆహారం తీసుకునేటప్పుడు నోరు మూసుకుని నమిలితే గాలి లోపలకి వెళ్లదు. మాట్లాడుతూ తినడం, నోరు తెరుచుకుని నమలడం వంటి అలవాట్ల కారణంగా కడుపులోకి గాలి ఎక్కువగా వెళ్తుంది. నిదానంగా నమిలి తింటే పొట్టలో గాలి చేరకుండా చూసుకోవచ్చు. పాలు, చిక్కుడు జాతి కూరలు, క్యాబేజీ, ఉల్లిపాయతోపాటు వేపుళ్లను తగ్గించు కోవాలి. అప్పుడే వాయువులు తగ్గుతాయి. అల్లం, శొంఠి, ఇంగువ, వాము, పుదీనా, సోంపు, జీలకర్రను ఎక్కువగా వాడుతుంటే ఈ సమస్యను తగ్గించుకోవచ్చు. దీనివల్ల తేన్పులను నిరోధించవచ్చు. ముఖ్యంగా ఒకసారి తీసుకున్న ఆహారం జీర్ణమయ్యేవరకు మళ్లీ తినకూడదు.

చిట్కాలు

* వాము వేయించి పొడి చేసుకోవాలి. కొద్దిగా వేడి అన్నంలో చెంచా వాముపొడి, అరచెంచా కరిగించిన నెయ్యి వేసుకుని తినాలి.
* జీలకర్ర వేయించి పొడి చేసుకొని భద్రపరుచుకోవాలి. కప్పు నీటిలో చెంచా పొడి వేసి మరిగించాలి. నీరు సగం అయ్యాక ఈ కషాయాన్ని గోరువెచ్చగా ఉన్నప్పుడే కొద్దిగా బెల్లం కలిపి తాగాలి.
* పుదీనా పచ్చడిని తరచూ ఆహారంలో తింటూంటే తేన్పులు తగ్గుతాయి.
* భోజనం చేసిన వెంటనే అరచెంచా సోంపు నోట్లో వేసుకుని నెమ్మదిగా నమిలినా ఉపశమనం ఉంటుంది.
* రెండు లేదా మూడు లేత తమలపాకుల్లో కొద్దిగా వక్క, సున్నం, ఒక లవంగం వేసుకోవాలి. అన్నం తిన్న తరువాత ఈ తాంబూలం నోట్లో పెట్టుకుని నెమ్మదిగా నములుతూంటే సమస్య చాలామటుకు తగ్గుతుంది.

మీ ప్రశ్నలు vasuayur@eenadu.net కు పంపించగలరు.