అమరావతి: పదోతరగతి ప్రతిభావంతులకు ఏటా ఇచ్చే అబ్దుల్‌ కలాం పురస్కారాల పేరు మార్పుపై ఏపీ ప్రభుత్వం వెనక్కు తగ్గింది. అబ్దుల్‌ కలాం పేరిట ఉన్న పురస్కారాన్ని వైఎస్‌ఆర్‌ పేరిట అందించనున్నట్లు నిన్న ప్రభుత్వం ఉత్తర్వులు జారీ చేసింది. దీనిపై సామాజిక మాధ్యమాల్లో విస్త్రృత చర్చ జరిగింది. దేశానికి ఎంతో సేవ చేసిన అబ్దుల్‌కలాం పేరు మార్చడం ఆయన్ను అవమానించడమేనని తెదేపా అధినేత చంద్రబాబు తప్పుబట్టారు. ఈ నేపథ్యంలో ముఖ్యమంత్రి జగన్‌ తీవ్రంగా స్పందించారు. తనకు తెలియకుండా ప్రతిభా పురస్కారాల పేరు మార్చారని ఆగ్రహం వెలిబుచ్చారు. పురస్కరాలను యథాతథంగా అబ్దుల్‌ కలాం పేరిటే అందించాలని ఆదేశించారు. సదరు ఉత్తర్వులను వెంటనే రద్దు చేయాలని అధికారులను ఆదేశించారు. కలాంతోపాటు గాంధీ, అంబేడ్కర్‌, పూలే, జగ్జీవన్‌రామ్‌ వంటి మహనీయుల పేర్లతో అవార్డులు ఇవ్వాలని సూచించారు.