ఏఐతో రూపొందిన సరికొత్త సాధనం

టొరంటో: కార్లలో ఒంటరిగా ఉండిపోయిన చిన్నారులు లేదా పెంపుడు జంతువులను రక్షించడానికి ఒక కొత్త సెన్సర్‌ను శాస్త్రవేత్తలు రూపొందించారు. కృత్రిమ మేధస్సు (ఏఐ)తో తయారైన ఈ సాధనం అలారం మోగించడం ద్వారా పనిచేస్తుంది. కొంత మంది పొరపాటున కానీ, ఇప్పుడే వచ్చేద్దాంలే అన్న ఆలోచనతో కానీ చిన్నారులను, పెంపుడు జంతువులను కార్లలో వదిలి వెళుతుంటారు. ఆ తర్వాత ఆ విషయాన్ని మర్చిపోతుంటారు. ఇది ప్రాణహానికి దారితీయవచ్చు. అలాంటి సమస్యలకు ఈ సాధనం పరిష్కారం చూపుతుంది. ఇందులో రాడార్‌ పరిజ్ఞానానికి ఏఐని జోడించారు. ఇది అరచేతిలో ఇమిడిపోతుంది. దీన్ని వాహనంలోని రియర్‌ వ్యూ మిర్రర్‌కు కానీ వాహన పైకప్పునకు కానీ అతికించవచ్చు. ఇది రాడార్‌ సంకేతాలను ప్రసరింపచేస్తుంది. అవి వాహనంలోని వ్యక్తులు, జంతువులు, వస్తువులను తాకి పరావర్తనం చెందుతాయి. ఇలా తిరిగొచ్చిన సంకేతాలను ఏఐ వ్యవస్థ విశ్లేషిస్తుంది. చిన్నారులు, పెంపుడు జంతువులను వదిలేస్తే గుర్తించి, అప్రమత్తం చేస్తుంది. ఈ రాడార్‌ తరంగాలు సీట్ల గుండా కూడా చొచ్చుకెళతాయి.