దిల్లీ : ప్రపంచస్థాయి ప్రమాణాలతో జాతీయ పోలీసు విశ్వవిద్యాలయాన్ని నెలకొల్పేందుకు కేంద్రం యోచిస్తోంది. ఈ విషయాన్ని కేంద్రమంత్రి కిషన్‌ రెడ్డి పార్లమెంటులో వెల్లడించారు. పోలీసింగ్‌, లా ఎన్‌ఫోర్స్‌మెంట్‌, అంతర్గత భద్రత, ప్రజాభద్రత వంటి అంశాలపై ఈ విశ్వవిద్యాలయంలో విద్య, పరిశోధనలకు అవకాశం ఉంటుంది. ఇందులో చేరేవారికి పోలీస్‌ సైన్స్‌స్‌, సైబర్‌ ఫోరెన్సిక్‌, విపత్తు నిర్వహణ, క్రిమినాలజీ వంటి కోర్సులు ఉంటాయని కిషన్‌రెడ్డి తెలిపారు. ఈ విశ్వవిద్యాలయానికి వెచ్చించే మొత్తం నిధులను కేంద్రమే భరిస్తుందని తెలిపారు. పార్లమెంటులో ప్రవేశపెట్టిన జాతీయ పోలీసు విశ్వవిద్యాలయ చట్టం ప్రకారం యూనివర్సిటీ విధివిధానాలుంటాయని వెల్లడించారు. 

పోలీస్‌, శాంతిభద్రతలు రాష్ట్రాల పరిధిలోని అంశాలు. పోలీసు విభాగం పరిపాలనలో మార్పులు, సంస్కరణలు చేయాలంటే తప్పనిసరిగా రాష్ట్రప్రభుత్వాలకు, కేంద్రపాలిత ప్రాంత యంత్రాంగం దృష్టికి తీసుకురావాల్సి ఉంటుంది. పోలీసింగ్‌ వ్యవస్థ ఆధునికీకరణకు, సంస్కరణలు చేపట్టేందుకు రాష్ట్రాలకు కేంద్రం కూడా ప్రత్యేకంగా ప్రోత్సాహకాలు అందజేస్తుందని కేంద్రమంత్రి కిషన్‌రెడ్డి చెప్పారు.