బెంగళూరు:  సాంకేతిక విజ్ఞానం, విభిన్నమైన పరిశ్రమలు విస్తరిస్తున్న నేపథ్యంలో సమాజంలో విప్లవాత్మకమైన మార్పులు వస్తున్నాయి. ఈ పోటీ ప్రపంచంలో ఉపాధి అవకాశాలను అందిపుచ్చుకోవడంలో మహిళలు, పురుషులు అనే తేడా లేకుండా సమానంగా పరుగులు పెడుతున్నారు. ఈ తరుణంలో ఇప్పటికే ఐటీ రంగంలో మహిళలు రాత్రిపూట షిఫ్టుల్లో పనిచేస్తుండగా.. ఇతర రంగాల్లోనూ వారు రాత్రి వేళల్లో పనిచేసేలా కర్ణాటక ప్రభుత్వం ఓ కీలక నిర్ణయం తీసుకుంది. ఉత్పత్తి రంగంతో పాటు ఇతర పరిశ్రమల్లో కూడా మహిళలు ఇకపై రాత్రిపూట (రాత్రి 7గంటల నుంచి ఉదయం 6గంటల వరకు) పనిచేసేందుకు అవకాశం కల్పిస్తూ నోటిఫికేషన్‌ జారీ చేసింది. ఫ్యాక్టరీల చట్టం - 1948 చట్టంలోని సెక్షన్‌ 66(1)(b)సెక్షన్‌ ప్రకారం మహిళలు రాత్రిపూట పనిచేయడం నిషిద్ధం. అయితే, దీన్ని మద్రాస్‌ హైకోర్టు కొట్టివేస్తూ గతంలో ఇచ్చిన తీర్పును కర్ణాటకలోని యడియూరప్ప సర్కార్‌ ఉటంకించింది. ప్రభుత్వం తీసుకొచ్చిన ఈ తాజా నోటిఫికేషన్‌తో ఉత్పత్తి రంగంతో పాటు ఇతర రంగాల్లోనూ మహిళలు రాత్రిపూట పనిచేసే అవకాశం కలగనుంది.