ముంబయి: బాలీవుడ్‌ నటుడు రణ్‌వీర్‌ సింగ్‌ కథానాయకుడిగా నటించిన చిత్రం ‘సింబా’. తెలుగులో ఎన్టీఆర్‌ నటించిన ‘టెంపర్‌’ సినిమాకు ఇది రీమేక్‌గా వచ్చింది. రోహిత్‌ శెట్టి దర్శకత్వం వహించారు. సారా అలీ ఖాన్‌ కథానాయిక. ఈ చిత్రంలోని ‘మేరే వాలా డ్యాన్స్’ అనే పాటను చిత్రబృందం విడుదల చేసింది. ఇందులో రణ్‌వీర్‌ తన డ్యాన్స్‌లతో ఆకట్టుకుంటే.. అతిథి పాత్రలో నటించిన సింగం అలియాస్‌ అజయ్‌ దేవగణ్‌ యాక్షన్‌ సన్నివేశాలతో ఆకట్టుకున్నారు.

అజయ్‌ను చూసి రణ్‌వీర్‌ సెల్యూట్‌ చేసిన సన్నివేశంతో పాట మొదలైంది. సారా అలీ ఖాన్‌ తన అందం, డ్యాన్సులతో ఆకట్టుకుంటున్నారు. లిజో జార్జ్‌, డీజే చెతాస్‌ కంపోజ్‌ చేసిన ఈ పాటను నేహా కక్కర్‌, నకాశ్‌ అజీజ్‌ ఆలపించారు. ఈ  చిత్రంలో రణ్‌వీర్‌ భలేరావ్‌ అలియాస్‌ సింబా పాత్రలో నటిస్తున్నారు. ప్రకాశ్‌ రాజ్‌, సోనూ సూద్‌ ప్రతినాయకుల పాత్రలు పోషించారు. శుక్రవారం ఈ చిత్రం ప్రేక్షకుల ముందుకు రాబోతోంది.