బెంగళూరు: భారత్‌ ప్రతిష్ఠాత్మకంగా ప్రయోగించిన ‘చంద్రయాన్‌-2’ అత్యంత విజయవంతంగా తన లక్ష్యం వైపు దూసుకెళ్తోంది. నిన్న కీలక ఘట్టం విజయవంతంగా పూర్తయిన విషయం తెలిసిందే. ఈ వ్యోమనౌకలోని ఆర్బిటర్‌ నుంచి ‘విక్రమ్‌’ ల్యాండర్‌ నిన్న మధ్యాహ్నం 1:15కు విడిపోయింది. కాగా ఇస్రో నేడు మరో ఘట్టాన్ని విజయవంతంగా పూర్తి చేసింది. విక్రమ్‌ ల్యాండర్‌కు చెందిన తొలి కక్ష్యను మంగళవారం ఉదయం 8.05 నిమిషాలకు తగ్గించింది. ఇందు కోసం తొలిసారిగా విక్రమ్‌ ప్రపొల్షన్‌ సిస్టమ్‌ను వినియోగించి.. ఈ ప్రక్రియను 4 సెకన్లలో పూర్తిచేశారు.  దీంతో విక్రమ్‌ ప్రస్తుతం 104కి.మీX128కి.మీ కక్ష్యలోకి చేరింది. రేపు మరోసారి కక్ష్య తగ్గింపు ప్రక్రియను చేపట్టనున్నారు. 

జులై 22న శ్రీహరికోట నుంచి నింగిలోకి దూసుకెళ్లిన చంద్రయాన్‌-2 కొద్దిరోజుల పాటు భూ కక్ష్యలో పరిభ్రమించి, ఆగస్టు 20న చంద్రుడి కక్ష్యలోకి ప్రవేశించిన సంగతి తెలిసిందే. ఈ నెల 7న అంతిమ ఘట్టం చోటుచేసుకుంటుంది. ఆ రోజున ల్యాండర్‌లోని ‘పవర్‌ డిసెంట్‌’ దశ ఆరంభమవుతుంది. ఆ వ్యోమనౌకలోని రాకెట్లను మండించడం ద్వారా దాన్ని కిందకు దించుతారు. ఆ తర్వాత 15 నిమిషాల్లో ల్యాండర్‌.. చంద్రుడి దక్షిణ ధ్రువానికి చేరువలోని ప్రాంతంలో దిగుతుంది. నాలుగు గంటల తర్వాత అందులోని రోవర్‌ బయటకు వస్తుంది.