పక్కాలోకల్‌

దీపావళి పండగ అంటే మనకి మిఠాయిలే గుర్తుకొస్తాయి. కానీ ఆదిలాబాద్‌ జిల్లా ఆదివాసీలకు మాత్రం దీపావళి అంటే గారెల పండగే. సామూహికంగా ఈ గారెలని వండుతారు. తమ ఆరాధ్యదేవతలకు వాటిని నైవేద్యంగా పెడతారు. దీపావళి సందర్భంగా ఆదిలాబాద్‌ జిల్లా ఉట్నూరు ఏజెన్సీలోని ఇంద్రవెల్లి, ఉట్నూరు, నార్నూర్‌, సిరికొండ, ఇచ్చోడ మండలాలతోపాటు కుమురం భీం జిల్లాలోని జైనూర్‌, సిర్పూర్‌, లింగాపూర్‌, తిర్యాణి మండలాల్లోని ఆదివాసీ గోండులు, కొలాంలు ఈ సంప్రదాయాన్ని తప్పక పాటిస్తారు. మినప్పప్పుని రుబ్బి పెనాలపై ఈ గారెలని కాల్చి దేవతలకు నైవేద్యంగా సమర్పిస్తారు. ఒక్క దీపావళి రోజే కాదు, తర్వాత వచ్చే వన భోజనాలప్పుడు... ముఖ్యమైన పండగలన్నింటికీ ఈ గారెలనే వండిపెట్టడం సంప్రదాయం. పావుకిలో నూనెతో రెండు కిలోల గారెలు సిద్ధమవుతాయి. రుచి బ్రహ్మండంగా ఉంటుంది.

- బండారు లక్ష్మీనర్సయ్య, న్యూస్‌టుడే, ఇంద్రవెల్లి