భారత్‌లో ఎన్ని కోట్లు రాబట్టిందో తెలుసా?

హైదరాబాద్‌: అగ్ర కథానాయకుడు విజయ్‌ నటించిన ‘విజిల్‌’ సినిమా బాక్సాఫీసు వద్ద దూసుకుపోతోంది. దేశవ్యాప్తంగానే కాకుండా విదేశాల్లోనూ సినిమా చక్కటి వసూళ్లు రాబడుతోన్నట్లు విశ్లేషకులు పేర్కొన్నారు. సినిమా భారత్‌లో రూ.100 కోట్ల క్లబ్‌లో అడుగుపెట్టినట్లు తెలిపారు. చెన్నై నగరంలో దాదాపు రూ.7 కోట్లు వసూలు చేసిందని పేర్కొన్నారు. అంతేకాదు తెలుగు రాష్ట్రాల్లో రూ.7.5 కోట్లు రాబట్టిందని అంచనా వేశారు. అమెరికాలో ఈ సినిమా రూ.93 లక్షలు కలెక్ట్‌ చేసినట్లు విశ్లేషకులు చెప్పారు. అంతేకాదు నార్వేలో అత్యధిక వసూళ్లు రాబట్టిన తమిళ సినిమాగా ‘విజిల్‌’ రికార్డు సృష్టించింది. రానున్న రోజుల్లోనూ వసూళ్ల జోరు ఇలానే కొనసాగే అవకాశం ఉందని విశ్లేషకులు చెబుతున్నారు.

దీపావళి సందర్భంగా అక్టోబరు 25న ‘విజిల్‌’ ప్రపంచ వ్యాప్తంగా ప్రేక్షకుల ముందుకు వచ్చింది. దర్శకుడు అట్లీ చిత్రాన్ని అద్భుతంగా తీశారని విమర్శకులు ప్రశంసించారు. నయనతార కథానాయిక. విజయ్‌ ద్విపాత్రాభినయం చేశారు. జాకీ ష్రాఫ్‌, వివేక్‌, యోగిబాబు, దేవదర్శిని తదితరులు కీలక పాత్రలు పోషించారు. ఎ.ఆర్‌. రెహమాన్‌ బాణీలు అందించారు. ‘తెరి’, ‘మెర్సల్‌’ తర్వాత అట్లీ-విజయ్‌ కాంబినేషన్‌లో వచ్చిన సినిమా ఇది కావడం విశేషం.