close
Facebook Share Twitter Share WhatsApp Share Telegram Share
అమెరికా నుంచి వధూవరులు..ఆగిన పెళ్లి

ఈనాడు, కాకినాడ: వరుడిది విజయవాడ. వధువుది తూర్పుగోదావరి జిల్లా పిఠాపురం. ఇద్దరూ అమెరికాలో సాఫ్ట్‌వేర్‌ ఇంజినీర్లుగా పనిచేస్తున్నారు. వీరిద్దరి పెళ్లి ఆదివారం ఉదయం 10.30 గంటలకు జరగాల్సి ఉంది. లండన్‌, మస్కట్‌ తదితర ప్రాంతాల నుంచి కొందరు స్నేహితులు వచ్చారు. ఇంకా పలు ప్రాంతాల నుంచి బంధువులూ అధిక సంఖ్యలో వచ్చారు. కరోనా విస్తృతి నేపథ్యంలో ఈ హడావుడిపై స్థానికులు ఆందోళన చెందారు. ఈ విషయాన్ని పిఠాపురం మాజీ ఎమ్మెల్యే వర్మ.. జిల్లా కలెక్టర్‌ దృష్టికి తీసుకెళ్లారు. దాంతో అధికారులు అక్కడకు చేరుకుని, వధువును స్వీయ నిర్బంధంలో ఉంచారు. అప్పటికి వరుడు ఇంకా వేదిక వద్దకు చేరుకోలేదు. దాంతో లండన్‌, మస్కట్‌ నుంచి వచ్చిన ఇద్దరితో పాటు వివాహ వేడుకకు వచ్చిన మరి కొందరికీ వైద్యపరీక్షలు నిర్వహించారు. ఇలా పెళ్లి వాయిదా పడింది. వధువు వారం క్రితమే అమెరికా నుంచి వచ్చినట్లు సమాచారం. ఆమెకు ఎలాంటి లక్షణాలు లేకపోయినా, వారం పాటు స్వీయనిర్బంధంలో ఉండాలని అధికారులు సూచించారు.

Tags :

మరిన్ని