close
Facebook Share Twitter Share WhatsApp Share Telegram Share
గల్ఫ్‌ దేశాల్లో గడబిడ

కరోనాతో కంపెనీల మూత
ఎక్కడి వారు అక్కడే
తెలుగు కుటుంబాల్లో ఆందోళన

ఈనాడు, హైదరాబాద్‌: సౌదీ అరేబియా... యునైటెడ్‌ అరబ్‌ ఎమిరేట్స్‌... కువైట్‌... ఒమన్‌... ఖతార్‌... ఇవన్నీ చాలామంది తెలుగువారికి సుపరిచితమైన గల్ఫ్‌ దేశాలు. వాటి అన్నింటా కలిపి 15 లక్షల మంది, హోటళ్లు, పర్యాటక ప్రాజెక్టులు, ఐటీ పరిశ్రమలు, రోడ్‌వేస్‌, ప్యాకింగ్‌ రంగాల్లో ఉపాధి పొందుతున్నారు. ఇళ్లల్లో, వివిధ క్షేత్రాల్లో కార్మికులుగా ఉన్నారు. దాదాపు రెండున్నర లక్షన్నర మంది కుటుంబాలతో జీవిస్తున్నారు. కరోనా మహమ్మారి గల్ఫ్‌ దేశాల్లోనూ కోరలు చాచి సృష్టిస్తున్న పెను సమస్యలు అక్కడి తెలుగు వారిని గందరగోళంలోకి నెట్టేశాయి.

బెహరైన్‌ మినహా...
సౌదీలో 50 వేలు, యూఏఈలో 45 వేలు, కువైట్‌లో 25 వేలు. ఖతార్‌లో 15వేలు,  ఒమన్‌లో 9 వేలు, బహరైన్‌లో ఆరున్నర వేల దాకా తెలుగు కుటుంబాలున్నాయి. ఇవి గాక కుటుంబ సభ్యులను తెలుగు రాష్ట్రాల్లోనే ఉంచి.. ఒంటరిగా వెళ్లిన వారు లక్షల మంది ఉన్నారు. బెహరైన్‌ మినహా మిగిలిన దేశాల్లో భారీఎత్తున కరోనా పాజిటివ్‌ కేసులు నమోదవుతున్నాయి. మరణాల సంఖ్య భారీగా ఉంటోంది. ఆయా దేశాల ఆర్థిక స్థితిపై, జీవనంపై కరోనా తీవ్ర ప్రభావం చూపుతోంది. అక్కడి ఆయిల్‌ కంపెనీలను మూసివేశారు. వలస వెళ్లి అక్కడ కుటుంబాలతో సహ ఉంటున్న తెలుగువారు ఇళ్లవద్దనే ఉండిపోతున్నారు. ప్రసిద్ధ సంస్థలు జీతాలు ఇస్తున్నాయి. నిర్మాణ సంస్థల్లో కొన్ని మాత్రమే వేతనాలు చెల్లించాయి. కరోనా ఎన్ని రోజులు ఉంటుందో, తమ ఉద్యోగాలేమిటనే దానిపై గల్ఫ్‌లోని తెలుగువారిలో తీవ్ర ఆందోళన నెలకొంది. గల్ఫ్‌ దేశాలకు రాకపోకలను నిషేధించారు. దీంతో అక్కడి మన తెలుగువారు ప్రస్తుతానికి సొంత ప్రాంతాలకు తిరిగి వచ్చే పరిస్థితి లేదు. కరోనా వ్యాప్తికి ముందు గల్ఫ్‌ దేశాలకు చాలా మంది విజిటింగ్‌ వీసాలపై వెళ్లారు. దాదాపు పది వేల మంది ఆయా దేశాల్లోనే ఉండిపోయారు. ఈ పరిస్థితుల్లో అక్కడ తెలుగువారు... ఇక్కడ వారి కుటుంబ సభ్యులు ఆందోళన చెందుతున్నారు. 


కంపెనీలు మూతపడుతున్నాయి

కరోనాతో కంపెనీలు మూతపడుతున్నాయి. ఈ సంక్షోభం త్వరగా ముగియాలని కోరుకుంటున్నాం. ఇక్కడి ప్రభుత్వం భారత్‌కు వెళ్లేందుకు అనుమతించినా. మనవారు విమానాలు లేక ఇక్కడే ఉండిపోతున్నారు..

-గొడిశాల అభిలాష, కువైట్‌


అప్రమత్తంగా బెహరైన్‌

బెహరైన్‌లో వ్యాధి నియంత్రణలో ఉంది. ప్రభుత్వం అప్రమత్తంగా ఉంది. ఇతర గల్ఫ్‌ దేశాల పరిస్థితిని చూసి ఇక్కడి కుటుంబాలు కంగారు పడుతున్నాయి.

-రాదారపు సతీశ్‌, బెహరైన్‌


రాకపోకలు ఎప్పుడో?

ఉపాధి, ఉద్యోగాల గురించి వచ్చి ఇక్కడ స్థిరపడ్డాం. కరోనా అందరి ఆశలను, అంచనాలను తలకిందులు చేసింది. కరోనా వల్ల రాక పోకలపై నిషేధం వల్ల... చాలా అనిశ్చితి నెలకొని ఉంది. కరోనా పరిస్థితుల్లో ఉపాధి కోల్పోయి తిరిగి వచ్చే వారికి ఉపాధి మార్గాలు చూపాలి. లేదా ఏదైనా ప్రత్యేక ప్యాకేజి ద్వారా ఆదుకోవాలి.

-అబ్బగాని శ్రీధర్‌, ఖతార్‌ 


దిక్కుతోచడం లేదు

 

యూఏఈలో కేసుల ఉద్ధృతిపై భయం ఏర్పడుతోంది. తెలుగు కుటుంబాల వారికి దిక్కుతోచడం లేదు. అక్రమంగా నివసిస్తున్న వారికి గతంలో క్షమాభిక్ష ప్రకటించినప్పుడు దుబాయ్‌ నుంచి 600 మంది స్వరాష్ట్రాలకు వెళ్లిపోయారు. ఇప్పుడు పనులున్న వారే మిగిలారు. కంపెనీలు మూతపడడడంతో వారి పరిస్థితి అగమ్యగోచరంగా మారింది.

-ఆరె శేఖర్‌, దుబాయ్‌

Tags :

మరిన్ని